АНУ-ын Төрийн нарийн бичгийн дарга Москва хотноо айлчилж байна. Энэ талаар “ВВС” болон “www.dailymail.co.uk” сайт мэдээллээ.
АНУ-ын Төрийн нарийн бичгийн дарга Рекс Тиллерсон Италийн Лукка хотноо зохион байгуулагдсан “Их 7” холбооны Гадаад хэргийн сайд нарын дээд хэмжээний уулзалтаа өндөрлүүлээд өчигдөр орон нутгийн цагаар 17.00 цагт ОХУ-ын нийслэл Москва хотноо ирлээ. Тэрбээр Москва хотноо хоёр өдөр айлчлах бөгөөд АНУ, ОХУ-ын үүсээд буй зарим асуудлыг хэлэлцэх юм. Рекс Тиллерсон өнөөдөр ОХУ-ын Гадаад хэргийн сайд Сергей Лавровтай уулзаж, цаг үеийн асуудлаар хэлэлцэнэ. “АНУ, Ассад хоёрын аль нэгийг Орос сонгох хэрэгтэй” хэмээн Тиллерсон Москва хотод айлчлахаасаа өмнө хэвлэлийнхэнд мэдэгджээ.
“ОХУ-ын эрх баригчид Сирийн Ерөнхийлөгч Башар аль Ассадыг дэмжих үү эсвэл АНУ-тай хамтран террористуудын эсрэг тэмцэх үү гэдгээ шийдэх хэрэгтэй. Би сайд Лавровтай уулзахдаа энэ нөхцөлөө танилцуулах болно. Энэ бол бидний сүүлчийн санал. Тиймээс ОХУ-ын эрх баригчид бидний саналыг ихээхэн нухацтай хүлээн авч, эцсийн хариугаа хэлэх хэрэгтэй. Бидний гол зорилго бол Сирийн ард түмний зовлонг багасгах. Сирийн тусгаар тогтнолыг хамгаалах” хэмээн Тиллерсон хэллээ.
Тэрбээр мөн Москва хотноо хийж буй айлчлалынхаа хүрээнд тус улсын Ерөнхийлөгч В.Путинтэй уулзаж, улмаар Ассадыг дэмжих ажиллагаагаа зогсоохыг ятгах зорилготой байгаа юм. Одоогоор Ерөнхийлөгч Путин, Тиллерсоныг Кремлийн ордондоо хүлээн авах эсэх нь тодорхойгүй байна.
Энгийн иргэдийн эсрэг химийн зэвсэг ашигласан гэх асуудлаас болж хоёр улс зөрчилдөж буй юм.
Сирийн босогчдын хяналтад байгаа Идлиб мужийн Хан Шейхун хотын иргэдийн эсрэг химийн зэвсэг ашигласан гэх дуулианы дараа АНУ-ын Ерөнхийлөгч Дональд Трамп “уг хэргийн ард Сирийн Ерөнхийлөгч Ассад бий” хэмээн мэдэгдэж, “ОХУ-ын эрх баригчдыг Сирийн Засгийн газрын цэргүүд химийн зэвсэг ашиглахыг мэдсээр байж ямар ч хариу арга хэмжээ аваагүй” хэмээн буруутгасан билээ. Хан Шейхун хотноо химийн зэвсэг ашигласны улмаас 89 хүн амиа алдаж, 500 орчим хүн хордоод байна. Амиа алдагсдын ихэнх нь хүүхдүүд юм.
Сирийн Ерөнхийлөгч Ассад дээрх хэрэгтэй ямар ч холбоогүй гэдгээ олон удаа мэдэгдсэн ч Трампийн бодлыг өөрчилж чадаагүй билээ. Цагаан ордны тэргүүн гол буруутанг олоогүй мөртлөө Сирийн Хомс хотноо байрлах агаарын баазыг пуужингаар харвасан юм. “59 ширхэг пуужин харвасаны 21 нь байгаа оносон болох”-ыг Пентагон мэдээлэв.
Гэхдээ энэхүү дайралтын улмаас Сирийн 15 иргэн амиа алдсан байна. Трамп “Сирийн иргэдийг хохироосон хүмүүсийг хашраахаар цохилт өгсөн ч үнэн хэрэгтээ гэмгүй иргэдийг хөнөөлөө” хэмээн “CNN” агентлаг мэдээлжээ. Трамп Сирид явуулсан цэргийн ажиллагаагаа “үр дүнтэй” хэмээн тодорхойлсон бол ОХУ-ын Ерөнхийлөгч Путин “Үр дүнгүй ажиллагаа” гэсэн байна. Путин мөн Трампийг байлдааны ажиллагаа явуулах нэрийдлээр энгийн иргэдийг хохироохгүй байхыг уриалжээ. АНУ, “Ассадын далавчийг салгах”-аар зорьж буй юм. Ассад өнгөрсөн онд Москва хотноо гэнэтийн айлчлал хийх үеэрээ “ОХУ-ын дэмжлэг бидний хувьд далавчаас өөрцгүй” хэмээн мэдэгдсэн билээ. Орос өнгөрсөн 2015 оны есдүгээр сараас Сирид байлдааны ажиллагаа явуулж, террористуудын эсрэг тэмцэх болсон юм.
Оросын дэмжлэгээр Сирид хяналтаа тогтоогоод байсан Исламын улс бүлэглэлийн хүч 50 орчим хувиар буурч, нийт дайчдынхаа 70 орчим хувийг алджээ. АНУ-ын экс Ерөнхийлөгч Барак Обама эрх мэдлээ дараагийн хүндээ шилжүүлэн өгөхөөсөө өмнө Оростой хамт Сирид цэргийн ажиллагаа явуулах сонирхолтой буйгаа Путинд олон удаа мэдэгдсэн боловч Кремлийн тэргүүн уг саналыг хүлээн аваагүй юм.
Путин “Орос, АНУ-ын цэргийн эвсэлд орох сонирхолгүй байна. Бид бие даан терростуудтай тэмцэнэ” гэсэн билээ. Трамп хэдий Обама шиг Путинийг шахан гадуурхах бодлого явуулаагүй байгаа ч хоёр улс хамтран Сирид цэргийн ажиллагаа явуулах нь нууц хэвээр байна. Трамп өчигдөр “FOX”сувагт ярилцлага өгөх үеэрээ Сирийн Ерөнхийлөгчийг “амьтан” хэмээн хэлж, олныг гайхшруулсан билээ. Тэрбээр мөн “Ассадын оролцоогүй Сирийн асуудлыг АНУ бие даан шийднэ. Ассадыг төрийн эрхээс түлхэн унагаах цаг ирсэн” гэж мэдэгджээ.
Б.Дэлгэрцэцэг