Хойд Солонгос цөмийн туршилтад бэлтгэж буй талаар Британийн “www.dailymail.co.uk” сайт мэдээллээ.

Хойд Солонгосын удирдагч Ким Чен Ун өчигдөр “Бид маш чухал зүйлд бэлдэж байна” хэмээн мэдэгджээ. Ким Чен Уны мэдэгдлийг барууны эрх баригчид тайлахдаа “Пхеньян цөмийн туршилтад бэлтгэж байна” гэсэн байна.

Пентагон “Хойд Солонгос цөмийн туршилтад бэлтгэж байж болзошгүй. Учир нь Ким Чен Уны мэдэгдэл ингэж бодоход хүргэлээ. Хэрвээ Хойд Солонгос улс цөмийн туршилт хийвэл бид хариу арга хэмжээ авахаас аргагүйд хүрнэ. Олон улсын энхтайвны төлөө бид харилцан хүлээцтэй байх хэрэгтэй” гэж мэдэгджээ. Энэ бямба гаригт Хойд Солонгосыг үндэслэн байгуулагч Ким Ир Сений мэндэлсний 105 жилийн ой тохиох билээ. Тус улс энэ өдрийг “Нарны өдөр” хэмээж бүх нийтээрээ амарч, үндэсний баярын хэмжээнд тэмдэглэн өнгөрүүлдэг юм. Эрх баригчид сүүлийн жилүүдэд “Нарны өдөр”-ыг тохиолдуулан улс орныхоо сүр хүчийг олон улсад гайхуулан баллистик пуужин турших болсон.

Ким Чен Ун өвөөгийнхөө мэндэлсэн өдөр баллистик пуужин туршихаас гадна цөмийн туршилт хийж магадгүй байгаа талаар тус улсад ажиллаж буй гадаадын сэтгүүлчид бичиж байна. Ким Ир Сений мэндэлсэн өдрийг сурвалжлахаар гадаадын 200 гаруй сэтгүүлч тус улсад ажиллаж буй юм. Энэ сэтгүүлчдийн ихэнх нь АНУ-ынх гэнэ. Сэтгүүлчид “Хойд Солонгос улс түүхэндээ зургаа дахь удаагаа цөмийн туршилт хийж магадгүй байна. Учир нь тус улс хилийн хамгаалалтаа нэмэгдүүлэхээс гадна Пхеньян дахь цөмийн туршилтын талбайд хөдөлгөөн ажигладах болсон” гэж мэдээлжээ.

АНУ-д үйл ажиллагаагаа явуулдаг сансар судлалын “38 North” гэх ажиглалтын баг Хойд Солонгосын “Пунгири”туршилтын талбайд хөдөлгөөн идэвхжиж эхэлсэнийг батлах хиймэл дагуулын хэд хэдэн зургийг барууны хэвлэлүүдээр цацсан байна. АНУ-ын Ерөнхийлөгч Солонгосын хойг руу байлдааны хөлгөө илгээсний дараахан “Пунгири” туршилтын талбай дахь хөдөлгөөн эрс нэмэгдсэн болохыг “38 North” багийн ахлагч баталж “Бидний таамаглаж буйгаар Пхеньян цөмийн туршилтад бэлтгэж байна. Энэ сарын 12-ны байдлаар хөдөлгөөн эрс нэмэгдэх болсон” гэж хэлжээ.

Хойд Солонгос 2006-2016 оны хооронд таван удаа цөмийн туршилт хийсэн юм. Тус улс өнгөрсөн 2016 оны нэгдүгээр сард цөмийн туршилт хийсэн бөгөөд уг туршилтаар хөрсөнд 5.6 баллын хүчтэй чичирхийлэл мэдрэгдсэн. Мөн өнгөрсөн оны эцсээр цөмийн туршилт хийсэн хэмээн Пхеньян мэдэгдсэн боловч уг мэдээллийг Өмнөд Солонгос, Японы удирдлагууд батлаагүй аж. “Пхеньян цөмийн туршилтад бэлтгэж байна” гэх “38 North” байгууллагын мэдээллийг Өмнөд Солонгосын эрх баригчид үгүйсгэж “Бид энэ асуудал дээр гол анхаарлаа хандуулан ажиглаж байна. Хэвийн биш үзэгдэл одоо хүртэл ажиглагдахгүй байна” гэж мэдэгджээ. Энэ талаар Өмнөд Солонгосын Засгийн газрын хэвлэлийн төлөөлөгч Ро Жэ Чу төрийн мэдлийн “Ёнхап” агентлагт ярилцлага өгөх үеэрээ дурдсан байна.

НҮБ, “АНУ, Солонгосын хойг руу байлдааны хөлгөө илгээснээр түгшүүртэй байдал үүсээд байна. Хоёрхон хоногийн дотор АНУ, Хойд Солонгосын дундах дайсагнасан харилцаа өмнөхөөсөө хурцадмал байдалд хүрлээ. Өмнөд Солонгос уг асуудал дээр анхаарлаа хандуулан ажиллаж, гарч болзошгүй эрсдлээс энгийн иргэдийг хамгаалах шаардлагатай” гэж мэдэгджээ.

Мөн НҮБ, Хойд Солонгосыг дахин цөмийн туршилт хийвэл хатуу арга хэмжээ авч ажиллахаа сануулсан байна. Пхеньян өнгөрсөн онд цөмийн туршилт хийсний дараахан НҮБ тус улсад үзүүлдэг бүхий л туслалцаагаа зогсоож, гадаад дахь дансуудыг нь царцаасан юм. Мөн Пхеньянд цөмийн зэвсэг, баллистик пуужин үйлдвэрлэхэд шаардлагатай түүхий эдийг нийлүүлсэн орон, хувь хүнийг хар дансандаа нэмэхээ сануулсан аж.

НҮБ, Пентагон тус улсын цөмийн туршилтад бэлтгэж буй талаар болгоомжлон ашиглах үеэр АНУ-ын Ерөнхийлөгч “Хойд Солонгос цөмийн туршилт хийвэл харамсах болно” гэж мэдэгджээ. Тэрбээр хэдхэн хоногийн өмнө100, 000 тонн жинтэй “USS Carl Vinson” нисэх онгоц тээвэрлэгчийг дагалдах хөлгүүдийн хамт Солонгосын хойг руу илгээсэн билээ. “Уг цэргийн анги Японы тэнгисийн ангитай хамтарсан цэргийн сургуулилт хийнэ” хэмээн Пентагон мэдээлэв.

Трамп байлдааны хөлгөө илгээсэн асуудлаар БНХАУ-ын Гадаад хэргийн сайд Ван И мэдэгдэл хийжээ. Тэрбээр “Цэргийн хүч асуудлыг шийдэж чадахгүй. Байдлыг улам хурцдуулах эрсдэлтэй гэдгийг дахин сануулах хэрэгтэй” гэсэн бол Японы Ерөнхий сайд Шинзо Абе “Пхеньянаас ирэх заналхийллээс бид их эмээж байна” гэж мэдэгджээ.

Б.Дэлгэрцэцэг