УИХ-ын гишүүн Д.Лүндээжанцан нийслэлийн Баянгол дүүрэг дэх УИХ-ын тойргоос сонгогдсон. Тэрбээр сонгогдсоноосоо хойш бямба гариг бүрт  тойрогтоо ажиллан, иргэдтэй уулзалт хийх болсноо мэдэгдэж байсан. Энэ удаад тэрбээр “Гандангийн дэнж”-ийн иргэдтэй уулзаж, дахин төлөвлөлтийн асуудлаар нийслэлийнхнийг байлцуулан мэдээлэл өгч,  иргэдийн саналыг сонссон байна.  Энэ нь түүний 44 дэх удаагийн уулзалт гэнэ.

Ер нь орон нутгаас сонгогдсон УИХ-ын гишүүд хавар, намрын чуулганаар тойрогтоо очиж ажиллан, сонгогчидтойгоо уулздаг. Бусад үед ажлын зав зайнаас хамаараад тэр бүр тойрогтоо очиж амждаггүй, бие төлөөлөгчөө ихэвчлэн илгээдэг  билээ. Харин нийслэлээс сонгогдсон гишүүдийн тухайд тойргоо эргэж, сонгогч иргэдтэй байнга уулзах боломж нь нээлттэй байдаг хэдий ч зарим гишүүд тэр бүр уулзаад байдаггүй бултдаг гэмтэй.

Харин Улсын бага хурлаас эхлээд байнгын ажиллагаатай парламентад тасралтгүй 7 дахь удаагаа сонгогдон рекорд тогтоож  байгаа ганц гишүүн Д.Лүндээжанцангийн хувьд энэ удаад ч тойрогтоо ажиллан, иргэдтэй хийсэн уулзалтаараа бусдыгаа хошуучилж байна. Тиймээс Баянголчууд сонголт ч мэргэн байсан бололтой. 

Н.Нягт