УИХ-ын чуулганы нэгдсэн хуралдаанаар 17 тэрбум ам.доллар оффшор бүсэд байгаа эсэх талаарх М.Оюунчимэг гишүүний асуулгад ХЗДХ-ийн сайд С.Бямбацогт хариулав. Дараагаар нь гишүүдийн асуултад ХЗДХ-ийн сайд С.Бямбацогт, АТГ-ын дарга Х.Энхжаргал нар хариулсан юм. Гишүүдийн асуултад АТГ-ын дарга Х.Энхжаргал:

-Оффшор бүсэд 49 иргэний нэр байдаг. 20 хүн нь төрийн албанд ажиллаж байсан, одоо ажиллаж байгаа тэдгээрийн хамаарал бүхий иргэд бий. Тэдгээрийн зарим нь байгуулаад ажиллуулаагүй, зарим нь бизнес хийх гэж байсан. Хууль гарснаас хойш компаниа татаж буулгасан гэж байгаа. Манайд энэ талаарх бичиг баримтаа өгсөн хэмээсэн хариулсан юм. УИХ дахь АН-ын бүлгийн дарга Д.Эрдэнэбат:

-Оффшор бүсэд хамааралтай 20 хүн нь төрийн албанд ажиллаж байсан, одоо ажиллаж байгаа тэдгээрийн хамаарал бүхий иргэд бий гэж байна. Гэтэл та нар ганцхан С.Баярцогтыг л нэр дурдаад байдаг. Оффшор бүсэд данстай улстөрд холбоотой дөрвөн хүний нэр байгаа шүү. . Тухайлбал, энэ парламентаас УИХ-ын гишүүн Сү.Батболдын ах Бат-Очир, Г.Тэмүүлэнгийн авга ах Батзориг, Б. Дэлгэрсайхан, Д.Цогтбаатар гэсэн дөрвөн хүн байгаа. Энэ дөрвөн хүн мэдүүлгээ өг. Хэдий болтол ганц С.Баярцогтыг нэрлэх юм. Улстөрчид ёс зүйтэй бай хэмээлээ. Үүний дараагаар УИХ-ын гишүүн Б.Дэлгэрсайхан:

-Би 24 жил бизнес хийсэн хүн. Ингэхдээ Монголд 100 тэрбум  ам.долларын оруулж ирсэн байдаг. Гадныхантай хамтрах гэхээр данс нээхийг шаарддаг. ХЗДХ-ийн сайд С.Бямбацогтын мэдээлэлд дурдагдсан. Өнгөрсөн 20 гаруй жилийн хугацаанд орж ирсэн гадаадын хөрөнгө оруулалтай компанийн 70 гаруй хувь нь оффшор бүсэд данстай гэдэг нь үнэн. Тэндээ биднийг ч данс нээж, хамтрах санал тавьдаг. Гэхдээ би улс төрд орж ирэхээсээ өмнө оффшорт байсан дансаа хаасан. Данс хаахад 5-6 сар шаардагддаг юм билээ. Д.Эрдэнэбат дарга аа танай нам эрх барьж байхдаа бизнесмэнүүдийг дээрэмдэх бодлого явуулсан. Тийм учраас ч гаднын хөрөнгө оруулалт зогссон. Үүнийг далимдуулж зээл аваад энэ зээлээрээ тоглосон. Оффшор гэж хэт туйлширвал гаднын хөрөнгө оруулагч ч үргэнэ. Цаашлаад эдийн засаг хүндрэх аюултай хэмээлээ. 

Асуулга тавьсан гишүүн М.Оюунчимэг "Оффшор бүст байгаа мөнгө батлагдаагүй, тэгсэн хэрнээ их хэмжээний мөнгө гадагшаа гарсан байдаг. Тэгвэл хууль бусаар олсон  мөнгөө дотооддоо дараад байна уу гэх хардлага ч төрүүлж байна. Тиймээс энэ бүхнийг нээлттэй болгож, мэдээлэх хэрэгтэй" гэсэн юм. 

Ингээд асуулгын хариулт дуусгавар болж, Зөрчлийн тухай хуулийн шинэчилсэн найруулгын төслийг үргэлжлүүлэн хэлэлцэж байна. 

Чуулганы хуралдаан үргэлжилж байна. 

Н.Энх