МАН-ын бага хурлын VIII хуралдаан үргэлжилж байна. Бага хурлаар Монгол Улсын Ерөнхийлөгчийн 2017 оны сонгуульд нэр дэвшигчээ тодрууллаа. Удирдах зөвлөлөөс Ерөнхийлөгчийн сонгуульд нэр дэвших эрхээ авсан УИХ-ын дарга, МАН-ын дарга М.Энхболд, УИХ-ын дэд дарга Ц.Нямдорж хоёрт санал хураалт явагдаж өндөрлөв. Нууц санал хураалтаар бага хурлын 259 гишүүний 222 нь буюу 85.7 хувь нь М.Энхболдод, 47 нь буюу 14.2 хувь нь Ц.Нямдоржид саналаа өгсөн тооллогын комиссын дүнг гарчээ. Тооллогын комиссын дүнг бага хурлын гишүүдэд мэдээлсний дараа нэр дэвшигч үг хэлсэн юм. УИХ-ын дэд дарга Ц.Нямдорж:
-Санал хураалтын дүнг ерөнхийдөө мэдэж байсан, би. Тиймээс надад цочирдох зүйл байхгүй. Хариуцлагатай сонгууль ирж байна. Монголын ард түмэн цайныхаа цацлыг “Төрийн минь сүлд өршөө” гэж тэнгэртээ өргөдөг. Төрийн тэргүүнээр сонгогдоно гэдэг нэг талаас асар их хариуцлага, нөгөө талаас аз байдаг. Одоогийн Ерөнхийлөгч найман жил болж, бүрэн эрхийн хугацаа нь дуусгавар болж байна. Шинэ хүн гарах болж байгаа.
М.Энхболд даргад Ерөнхийлөгчийн сонгуульд ялж, Төрийн тэргүүнээр сонгогдох ерөөлийг дэвшүүлье. Би та бүхэнтэйгээ хамтарч М.Энхболд даргын сонгуульд чадах ядахаараа зүтгэнэ гэдгийг хэлье.
Надыг дэмждэг хүмүүс цөөнгүй. Би тэр хүмүүстээ хандаж үг хэлэх гэсэн юм. “Нямдорж явж байна гэж бодоод М.Энхболд даргыг дэмжиж өгөөрэй” гэж чинь сэтгэлээсэй хүсэх гэсэн юм. Энэ сонгуулийн ард гарах байх гэж найдаж байгаа. М.Энхболдын даргадаа амжилт хүсч байна.
Тэнгэр биднийг өршөөж, төрийн минь сүлд тэтгэг ээ хэмээлээ.
Н.Энх