УИХ-ын чуулганы үдээс хойшхи хуралдаан эхэллээ. Үдээс хойшхи хуралдаанаар Төрийн албаны тухай хуульд нэмэлт, өөрчлөлт оруулах тухай хуулийн төслийн хэлэлцэх эсэхийг шийдэж байна. Энэ хуулийн төслийг Ерөнхийлөгч санаачлан өргөн мэдүүлсэн юм. Чуулганы үдээс өмнө хуралдаанаар Д.Тогтохсүрэн нарын 12 гишүүний санаачилсан Төрийн албаны тухай хуулийн шинэчилсэн найруулгын төслийг хэлэлцсэн.
Ерөнхийлөгчийн санаачилсан Төрийн албаны тухай хуульд нэмэлт өөрчлөлт оруулах тухай хуулийн төслийн танилцуулгыг Ерөнхийлөгчийн зөвлөх Г.Өнөрбаяр хийж, гишүүдийн асуултад хариулж байна. УИХ-ын гишүүн Д.Гантулга “Бид сонгуулийн дараагаар агентлагийн дарга нарыг сольдог. Тиймээс агентлагийн даргын албан тушаалыг улс төрийн алба болгочихвол ямар вэ” гэсэн бол УИХ-ын гишүүн Н.Энхболд “Төрийн албаны тухай хууль хэвээрээ байж байхад Засгийн газар олон хүнийг чөлөөлж томилдог. Төрийн албыг тогтвортой, улс төрөөс ангид байлгах асуудалд анхаарах хэрэгтэй” гэлээ.
УИХ-ын гишүүн О.Баасанхүү “Одоо хуралдаанд 12 хүн сууж байна. Үүнийг яах вэ, УИХ-ын дарга аа. Улс төрийн албан тушаалтнуудыг яаж чадавхижуулах, хариуцлагажуулах талаар хуулинд тусгаж өгөх хэрэгтэй” хэмээв.
Ийнхүү чуулганы хуралдаан үргэлжилж байна.
Уншиж байна |