АН-ын нарийн бичгийн дарга О.Магнай сэтгүүлчдэд мэдээлэл хийлээ. Тэрбээр:
-МАН-аас УИХ-д сонгогдсон нэг гишүүн концессийн гэрээтэй холбоотой дүгнэлтийг бидэнд өчигдөр авчирч өгсөн. УИХ дахь МАН-ын бүлэг Засгийн газрын баталсан найман концесстой холбоотой асуудлаар ажлын хэсэг байгуулж, ажилласан, дүгнэлт гаргасан байгаа. МАН-ын 65-ын бүлэгт эх орноо боддог ганц гишүүн байгаад баяртай байна.
Нийт 807 тэрбумын өртөгтэй найман концессийн асуудал байгаа. Дүгнэлтэд “Засгийн газар 2018 оны төсвийн жил хүртэл барих, шилжүүлэх төрлийн концессын гэрээ байгуулахыг хориглох тухай тогтоолоо таван сарын дараа өөрчилж, 2020 он хүртэл төсөвт хүндрэл учруулахгүй нэрийн дор дахин барих шилжүүлэх концессийн гэрээ байгуулах боломжийг бий болгожээ” гэсэн байгаа.
Өөрсдөө таван сарын өмнө концесс байгуулахыг бүрэн хориглож байсан атлаа тогтоолоо зөрчөөд “МАК” компанитай гэрээ байгуулсан нь тогтоолоор нь нотлогдож байгаа. Хоёр дахь асуудал нь концессийг ам.доллараар байгуулахаар гэрээнд тусгасан. Өөрөөр хэлбэл, Монгол Улсад өнөөдөр хүчин төгөлдөр байгаа төв банкны тухай хуулиар бүх гүйлгээ монгол төгрөгөөр хийгдэх ёстой. Гэтэл бүх эрсдэлээ хамгаалж, доллараар гэрээг хийсэн. Гадны хөрөнгө оруулагчид манай Засгийн газартай гэрээ хийхдээ эрсдэлээ хамгаалж доллараар гэрээ хийе гэдэг. Энэ хулгайнаас болж, төрд хохирол учирч байгааг тоогоор хэлье. 2020 он гэхэд 327.3 тэрбум, 2021 онд 216.2 тэрбум, 2020 оны төсөвт 540 тэрбум төгрөгийн ачаалал тус, тус төсөвт өгөхөөр ийм хулгайг хийх гэж байна. Энэ бол байж боломжгүй зүйл.
Засгийн газрын 2017 оны нэгдүгээр сарын 18-ны өдрийн 16 дугаар тогтоол гарсны дараа “МАК” компанитай байгуулсан гэрээгээ дахин өөрчилсөн байгаа. Энэ Засгийн газрын сайд нар нь хулгай хийхийн төлөө Засгийн газарт орсон юм шиг аашилж байгаа бол АН зүгээр хараад сууж чадахгүй, холбогдох байгууллагад нь хандана хэмээлээ. Тэрбээр мэдээлэл хийснийхээ дараа сэтгүүлчдийн сонирхсон асуултад хариулсан юм.
-Та бүхэнд дүгнэлт авчирч өгөх МАН-ын гишүүний нэрийг хэлж болох уу?
-Нэрийг нь хэлчихвэл намаасаа хөөчих байх. Гэхдээ тэр хүний хэлснээр бол хулгай эх захаа алдлаа. Урьд нь тендэр нэрийн дор хулгай хийдэг байсан бол өнөөдөр концесс нэрийн дор хулгай хийдэг шинэ сувагтай боллоо гэсэн. Тийм учраас сөрөг хүчний хувьд АН-д мэдээлэл өгье гэсэн. Бид тэр гишүүнд талархаж байгаа.
Уншиж байна |