Цахим сүлжээнд өөрийн видео бичлэгээ байршуулж, олон нийтэд танигдсан О.Осоржамаад “Сити” дээд сургуулийн зүгээс үнэ төлбөргүй суралцах эрхийн бичиг гардуулав. Одоо охидын нөүтбүүкийг түр зээлж, хэрэгцээндээ ашиглаад буцааж өгөхөө мартчихдаг Тэлмэнд хэн нэгэн сайхан сэтгэлтэн нөүтбүүк аваад өгчихвөл ч сошиал медиагийн ид шидийг бид нүдээр үзэх нь.
Гар утсаараа лайв гэгчийг хийж элийрээд л оюутан. Яахав чадаж байна. О.Осоржамаагийн бичлэгүүд нь үнэндээ их сургуульд дөрвөн жил үнэ төлбөргүй суралцах урилга хүлээж авахаар тийм үр дүн, ач холбогдолтой байсан уу гэвэл үгүй. Сошиалаар олон хүн ам дамжин түүний тухай ярилцаж, бичлэгээр дамжуулан ярьсан зүйлийг нь доог дохуу болгож биендээ түгээсэн.
Олны анхаарлын төв түүн дээр чиглэсэн болохоор овжин нэг нь студидээ урьж ярилцлага хийсэн. Нөхөр ч амьдралаа ярьж, аав ээж нь өнгөрсөн. Тогоочийн курс төгсөж, гудамжинд шорлог зардаг тухайгаа ярьсан. Тэгээд жүжигчин болох мөрөөдөл чин зүрхэндээ тээж явдаг ч амьдралын боломжгүйгээс суралцаж чадахгүй яваагаа хэлжээ. Энэ байдаг л амьдрал.
Тэгсэн нэг сургууль “хөөрхөн” маркетинг хийж мань хашрыг дөрвөн жил сургуульдаа үнэ төлбөргүй суралцах эрх бэлэглээд авлаа. Эрхийн бичгийг нь Монголдоо л чадвартайд тооцогддог жүжигчнээр гардуулсан нь тун ч чамбай реклам байв. Нэг ч гэсэн залуу хүний хүсэл мөрөөдлийг үнэлж, ирээдүйд нь хувь нэмэр оруулж буй нь сайн хэрэг. Гэхдээ лайв хийж хэнд хэрэгтэй нь мэдэгдэхгүй дэмий зүйл ярьснаараа сошиалд од болж, “шагнал” хүртээд байвал залуу хүний үнэлэмж буурах, тэдэнд бэлэнчлэх сэтгэлгээ суух талтай.
Өөр нэгэн сошиал “гол дүр” бол охидын нөүтбүүкийг эелдэгхэн гуйж аваад буцааж өгөхөө мартчихдаг Тэлмэн. Фэйсбүүкийн нэгэн хэрэглэгч Тэлмэн гэх залуу нөүтбүүкийг нь гуйж аваад буцааж өгөөгүй талаар гомдол бичиж, бухимдсан. Түүний уг постных нь дор Тэлмэнд нөүтбүүкээ алдсан олон охидын сэтгэгдэл хөвөрч, хэн хэн нь мэхлүүлснэээ гайхан, шагшрав.
Ганц нэгээрээ биш нэлээдгүй охин огт танихгүй царайлаг профайл зурагтай залууд мэхлэгдсэн нь үнэндээ тэнэг хэрэг. Тэгэхээр нөүтбүүкийг нь мэхэлж авсан Тэлмэн, түүний эелдэг харилцаа, этгээд донжтой төрхөнд нь хууртсан охид ч гээнэ дээ ч, гооно доо ч гэгчээр санагдсан.
Үүнээс улбаалан Тэлмэн гэх залуу сошиалд “од” болж олон нийт элэг доог хийх нь хийж, “Тэлмэн” гэж хэн юм бэ. Би юунаас хоцорчих воо” хэмээн хэрэгт дурлах хүмүүсийн тоо нэмэгдсээр л байна.
Тэлмэнд мэхлэгдсэн тухай гомдол мэдээлэл энэ сарын 20-нд цагдаагийн байгууллагад ирснээр Сүхбаатар дүүргийн цагдаагийн нэгдүгээр хэлтэст шалгаж эхэлсэн. Сэжигтэн Т цагдаад өгсөн мэдүүлэгтээ “Би түр гуйж хэрэглэсэн. Буцааж өгөх зав гарахгүй өгч амжихгүй явсан” гэсэн байх юм.
О.Осоржамааг оюутан болгож болсон. Одоо “Тэлмэн нэртнүүдийн холбоо” байгуулагдаж, Тэлмэн нэрний нэр хүндийг сэргээх зорилгоор Тэлмэнд нөүтбүүк авч өгөөд хэвлэлийн хурал хийчихвэл ч “хэрэг” бүтлээ.
Г.Тэгшсүрэн