МАН-аас Ерөнхийлөгчийн сонгуульд нэр дэвшигч УИХ-ын дарга М.Энхболдын сонгуулийн сурталчилгааны нээлт Тусгаар тогтнолын ордод боллоо.
Нээлтэд Монгол Улсын хоёр дахь Ерөнхийлөгч Н.Багабанди, Монгол Улсын баатар, ЗХУ-ын баатар, сансрын нисэгч Ж.Гүррагчаа, Ерөнхий сайд Ж.Эрдэнэбат, УИХ-ын гишүүн, МУ-ын сайд, ЗГХЭГ-ын дарга Ж.Мөнхбат, УИХ-ын гишүүн, Батлан хамгаалахын сайд Б.Бат-Эрдэнэ болон МУ-ын хөдөлмөрийн баатар, гавьяат тамирчин, олимпийн аварга Э.Бадар-Ууган, олимпийн мөнгөн медальт, дэлхийн аварга П.Сэрдамба тэргүүтэй урлаг, спортын алдартнууд оролцож байна.
МАН-аас нэр дэвшигч УИХ-ын дарга М.Энхболд:
-Ерөнхийлөгчийн сонгуулийн гарааны энэ гарман дээр Монгол түмнийхээ амар мэндийг айлтган мэндчилж, сайн сайханы ерөөлийг өргөн барья. Та бүхнийхээ итгэлийг тээн, улс орноо хямралаас гаргах даалгаврыг өвөрлөн энэ удаагийн Ерөнхийлөгчийн сонгуульд би нэр дэвшиж байна. Ялалтын үндэс бол итгэл юм гэсэн өвгөдийн сургаалийг санаж энэ сонгууль ялалтын төлөө, улс түмнийхээ төлөө хичээн зүтгэхээ андгайлж байна.
Монгол Улс бол угтаа нэг л айл. Хэрүүл тэмцэлтэй айл өөдөлдөггүй. Хагарч, эвдрэхийг би тэвчдэггүй. Бүтэн гэр бүл бол бүрэн төрийн тулгуур билээ. Дүүрэн жаргалтай өрх гэр, улс орныг тохинуулахын төлөө би Ерөнхийлөгчийн сонгуульд нэр дэвшиж байна. Бидний хүсэн мөрөөддөг сайн сайханд хүргэх шандаст хүлэг бол үндэсний эв нэгдэл гарцаагүй мөн юм. Талцаж сөргөөцөлдөж, тарааж нураахыг хойш тавьж, нэгэн үзүүрт харах цаг болжээ. Нэгдмэл үзэл бодолтой УИХ, Засгийн газар өнөөдөр зайлшгүй шаардлага бий болсон гэдгийг өнөөдөр олон түмэн ярьж хэлж байна.
Монголынхоо язгуур эрх ашгийн төлөө бүх монголчууд нэгдэж чадвал алсын зорилгодоо хүрч чадна. Эвлэлдэн нэгдэх энэ үйл явцыг эхлүүлж чадна гэсэн итгэл үнэмшил надад бүрэн дүүрэн байна. Эвийг эрхэмлэх нь миний баримталдаг алтан зарчим билээ. Олон намын төлөөлөлтэй Үндэсний эв нэгдлийн Засгийн газрыг томилон удирдаж байсан. Бүх намыг оролцуулсан зөвшилцөл бий болгохын төлөө хичээн зүтгэж ажиллаж байгаа. Улс үндэстнээ эвдрүүлэн талцуулагч биш эвээр нэгтгэгч Ерөнхийлөгч байж чадна.
Эх орны маань баялаг иргэн бүхний өмч тул түүнээс олох орлого ашгийг монголчууд бүгдээрээ хүртэх эрхтэй. Үнэ цэнийг нь үйлдвэрлэл, технологи, оюун ухааныг тэтгэх эх үүсвэр болгох учиртай юм. Иргэн бүрий ажилтай орлоготой болгоход зарцуулах эрхтэй. Миний аав “Бүтээн босгох хүн л энэ улсад хэрэгтэй” гэж надад захиж хэлдэг байсан. Тэр зарчмаараа бүтээн байгуулагч, баялаг бүтээгчдийг дэмжих ёстой гэж би үздэг. Баялаг бүтээгч, бизнес эрхлэгчдийг дэмжсэн хууль эрхзүйн орчныг бий болгож, үүнийг олон түмний дунд хэвшүүлэх, боломж бололцоог нь бүрдүүлэхийн төлөө би хичээж ажиллах болно. Өнгөрсөн 2016 оны УИХ-ын сонгуулийн амжилт бол хямралыг ялаарай гэж Монголын ард түмнээс бидэнд өгсөн харуицлагатай үүрэг даалгавар. Өгсөж байсан хямралыг бид аргамжиж чадсан. Удахгүй бид хямралаас гарна. Улмаар ахин дахин хямрахгүй байх дархлааг бүрдүүлэх болно.
Ингэснээр иргэн нь баян, эрүүл саруул, эрдэм боловсролтой, айх аюулгүй Монгол бий болж чадна. Хүүхэд залуус маань хөгжих орчин, хүсэлт мөрөөдлийг нь тэлэх төртэй байх ёстой. Эмэгтэйчүүдээ энэрдэг, асардаг, ядуугаа тэтгэдэг Монгол ёсоо дээдэлж байх ёстой. Эрүүл саруул, эрдэм боловсролтой Монгол хүн л Монголын бахархлыг бүтээж чадна. Монголдоо иргэнээ дээдэлсэн, дэлхийд Монголоо өргөсөн Ерөнхийлөгч байна.
Ард түмэн шударга ёс, хариуцлагыг нэхэж байна. Энэ бол хуулийн өмнө бүгдээрээ тэгш байх тухай шаардлага юм. Тиймээс албан тушаалын ялгаваргүйгээр хуулийн хариуцлага хүлээлгэдэг, иргэн болгон адил тэгш байдаг төрийн төлөө би зүтгэнэ.
Ард түмэн хүчтэй Ерөнхийлөгчийг хүсч байгааг би мэдэрч байна. Гэхдээ энэ нь бяртай, булчинтай хүнийг хайж байгаа хэрэг биш. Харин хуулиа нягт хэрэгжүүлдэг төрийг хүсч байгаа юм. Тиймээс би хууль, шударга ёс, хариуцлагыг эрхэмлэдэг, нэхэж шаарддаг Ерөнхийлөгч байна.
Би юмыг нураахаас илүүтэй босгохыг хичээдэг. Хотыг удирдсан он жилүүдийн минь мөрөөр нурсан балгас, ухсан нүх, овоолсон шороо үлдээгүй. Бүтээн байгуулалт үлдэж, хөгжлийн үндэс суурь тавигдсан. Хот хэмээх их айлын зовлон жаргалыг мэддэг хүний хувьд улсын нийслэлээ улам цэгцтэй хөгжүүлэх бодлогыг тууштай баримтлах болно. Эх орныхоо хаана нь ч иргэн бүр нь сайхан амьдрах бололцоог бүрдүүлэхийг баримталж ажиллана. Нэг улсын дотор хотынхон, хөдөөгийнхөн гэсэн хоёр өөр Монгол байж таарахгүй. Нэг л Монгол байж, нийтээрээ аз жаргалтай байх ёстой. Нийгмийн сайн сайхныг нийт ард түмэн нь хүртдэг улсын Ерөнхийлөгч байна.
Даяаршсан энэ дэлхийд Монгол өөр замаар явна гэвэл хаана ч хүрэхгүй нь ойлгомжтой. Тиймээс хоёр хөрш болон дэлхийн улс түмэнтэй эрх тэгш найрсаг харилцааг улам бэхжүүлэхийн төлөө зүтгэх болно.
Монголын хууль монголчуудын эрх ашигт шинэ технологи, иновацийг ашиглах, эх байгальд хор хөнөөлгүй аливаа хөтөлбөр төслийг бүрэн дүүрэн дэмжих бололцоог бүрдүүлсэн байх ёстой. Хяналт шаардлагыг минь биелүүлж, хөгжлийн зорилгод хамтрагч болж буй хэнийг ч бид хөөж туух учиргүй юм. Тиймээс би Монголын эрх ашгийг эн тэргүүнд тавьдаг Ерөнхийлөгч байна.
Би Монгол Улсын тусгаар тогтнол, аюулгүй байдлын манаач нь болохоор нэр дэвшиж байна. Төр тогтвортой бол түмэн олон амгалан байна. Төр тогтвортой бол төгрөг ч бас тогтвортой болдог. Төгрөг нь тогтворжихоор түмний амьдрал сайжирдаг. Энгийн бөгөөд гарцаагүй үнэн бол энэ. Миний өрсөлдөгч бол ХЯМРАЛ, ХАГАРАЛ хоёр юм. Хэлэхээс илүү хийх нь, хямралыг давах нь, хагарсныг эвлүүлэх нь өнөөдөр хамгаас чухал байна. Үндэснийхээ өв соёлыг дээдэлж, үр хойчдоо өвлүүлэн үлдээхийг эрхэмлэдэг, моринд дуртай монгол хүн миний Ерөнхийлөгчийн сонгуульд нэр дэвшсэний учир шалтгаан, зорилго эрмэлзэл энэ билээ.
Морьтой монгол мохож байсан түүхгүй ээ. Харин морьтой монгол холыг туулсан түүхтэй. Тиймээс би морьтой сүлдэндээ сүслэж, Монгол түмэндээ зүтгэнэ ээ.
"Эвтэй Монгол-Ээлтэй төрийн төлөө эвлэж хамтдаа зүтгэцгээе” хэмээв.
Ийнхүү Монгол Улсын Ерөнхийлөгчийн сонгуульд МАН-аас нэр дэвшигч УИХ-ын дарга, МАН-ын дарга М.Энхболдын сонгуулийн сурталчилгаа албан ёсоор эхэллээ.
Н.Энх