Дахин нэг онгоц осолджээ. Энэ талаар “www.aljazeera.com” сайт мэдээллээ.
Мьянмарын өмнөд хэсгийн Миейк хотоос Янгон хот хүрэхээр явж байсан цэргийн “Y-8” онгоц өчигдөр орон нутгийн цагаар 1.35 цагийн орчимд сураггүй алга болсон билээ.
Уг онгоцонд нисэх багийн 14 гишүүн болон 106 зорчигч зорчиж явжээ. Зорчигчдын ихэнх нь Мьянмарын армийн цэргүүд болон гэр бүлийнхэн нь байсан юм. Мөн зорчигчдын дунд бага насны 12 хүүхэд байжээ. Онгоц Давэй хот хүрэхээс 20 гаруй км дутуу байхад төв станцаасаа холбоо тасарч, удалгүй радарын дэлгэцнээс алга болсон байна.
Сүүлийн үеийн мэдээллээр аврагчид онгоцны сэг болон зарим зорчигчдыг цогцсыг олсон талаараа албан ёсоор мэдэгдлээ. Онгоцны сэгийг Андаман тэнгисээс олжээ. Тэнгисээс “Y-8” онгоцны залуур байх хэсгийг олсон байна. “Хараахан онгоцны эх биеийг олоогүй байгаа” талаар тус улсын Тээврийн яам мэдээлэв. Цэргийн нисэх онгоц эргүүл хийж байхдаа боомт хот болох Лаунголын зүүн эргээс 35 км-ийн цаанаас хоёр том хүн болон нэг хүүхдийн цогцсыг гаргаж авчээ.
Энэхүү мэдээллээс хэдхэн хормын дараа тус улсын Зэвсэгт хүчний албан ёсны фэйбүүк хуудастаа “Цэрэг эрс, тэдний гэр болон нисэх багийн гишүүдийг тээвэрлэж явж байсан нисэх онгоц Андаман тэнгист осолдлоо. Үнэхээр харамсалтай зүйл боллоо” гэж бичжээ. Андаман тэнгист тэнгисийн цэргийн хөлөг онгоцууд болон гурван нисдэг тэрэг эрэн хайх ажиллагааг явуулж байна. “Онгоцны эх биеийг олоогүй байгаа учир уг ослоор хэдэн хүн амиа алдсан эсэхийг нарийн мэдэх боломжгүй байгаа” талаар Тээврийн яамны мэргэжилтэн мэдэгдэв.
“Y-8” онгоцыг БНХАУ-д үйлдвэрлэсэн бөгөөд уг онгоцыг өнгөрсөн оны гуравдугаар сард худалдан авчээ. Энэхүү онгоц 809 цаг агаарт нислэг үйлджээ. Ахмад болон хоёрдугаар нисгэгч туршлагатай, сахилга бат сайтайгаас гадна ур чадвараараа хамт олноо тэргүүлдэг байжээ.
Мьянмар улсад борооны улирал эхэлсэн бөгөөд цаг агаар тааруу байгаа учир аврах ажиллагаанд саад учир байгаа гэв.
Тус улсад өмнө нь хэд хэдэн онгоц осолдож байжээ. Өнгөрсөн оны хоёрдугаар сард нийслэл хотноо нисэхийн онгоц осолдож, таван хүн амиа алдсан байна. Уг хэргээс хэдхэн сарын дараа мөн цэргийн нисэх онгоц Мьянмарын төвд осолдож, гурван албан хаагч амиа алджээ. 2012 онд агаарын тээврийн “An Air Bagan” компанийн хөлөг буулт хийх үедээ осолдож, хоёр хүн амиа алдсан байна.
Б.Дэлгэрцэцэг
Уншиж байна |