Дорноговь аймгийн Замын-Үүд сумын Ерөнхий боловсролын сургуулийн төгсөх ангийн сурагчид ЭЕШ-аа өгөхөөр явах замдаа зам тээврийн осолд өртсөн талаар өмнө нь мэдээлсэн.

Осол өнгөрсөн шөнө /2017.06.13/ 22.40 цагийн орчимд Дорноговь аймгийн Өргөн сумын нутагт гарчээ. “North benz” маркийн автомашин “Sonata 6” маркийн машинтай мөргөлдөж, дөрвөн хүн нас барж, хоёр хүн гэмтсэн байна. Ослын улмаас 49 настай эрэгтэй, 18 настай гурван эрэгтэй нас барсан болохыг албаны эх сурвалж мэдээллээ. Осолд өртсөн хүүхдүүд ЭЕШ-аа өгөхөөр Дорноговь аймгийн Сайншанд хотын зорьж явсан гэх мэдээллийг албан бус эх сурвалж хэлж байна.

Хэргийг Дорноговь аймаг дахь Замын цагдаагийн газарт шалгаж байна.

Сүүлийн жилүүдэд аймгийн төвүүдэд хатуу хучилттай авто зам ашиглалтад орсон нь олон талын ач холбогдолтой боловч жолоочид хурд хэтрүүлэх тохиолдол нэмэгдэж хүний амь нас хохирох явдал буурахгүй байгааг албаныхан мэдээлсэн. Тухайлбал өнгөрсөн 2016 онд зам тээврийн ослын улмаас 485 хүн нас барсны 72.5 хувь буюу 352 нь орон нутгийн замд осолдсон байна.

Иймд орон нутгийн замд хурдаа зөв тохируулж замын хөдөлгөөнд оролцохыг Замын цагдаагийн албанаас зөвлөж байна.

Г.Тэгшсүрэн