Өнөөдөр Монголын ард түмэн 15 эрэлхэг хөвгүүнээ алдсан эмгэнэлт өдөр тохиож байна.
Өдгөөгөөс 10 жилийн өмнө буюу 2007 оны зургадугаар сарын 14-нд онцгой байдлын аврагчид Сэлэнгэ аймгийн Мандал суманд гарсан гал түймрийг унтраахаар Ми-8 нисдэг тэрэгтэй яваад 16 аврагч замдаа амь үрэгдсэн эмгэнэлт хэрэг гарч байсан.
Сэлэнгэ аймгийн Мандал сумын нутаг, Хонин нугад гарч байсан ой хээрийн түймрийг унтраахаар 2007 оны зургадугаар сарын 14-ний өглөө Хилийн цэргийн ХЦ-8220 дугаартай Ми-8 нисдэг тэргээр Онцгой Байдлын Ерөнхий Газрын 15 шүхэрчин-гал сөнөөгч, онгоцны экипажийн дөрөв, нийт 19 хүний бүрэлдэхүүнтэй хөдөлжээ.
Нисдэг тэрэг Мандал сумын нутагт хүрч, Шар Товгор уулын зүүн энгэрт далайн төвшнээс дээш 1545 метрийн өндөрт унаж сүйрсэн. Ослын шалтгааныг шинжлэн шалгах техникийн комиссын дүгнэлтээр "Ил харааны нислэг хийх боломжгүй цаг агаарын нөхцөлтэй тулгарсан учир хэрэглээний нислэгт шилжихээр өндөр аван эргэлт хийх явцад орон зайн баримжаа алдснаар тайгын ургаа моддыг мөргөж осол гаргасан гэдэг.
Ослын улмаас 16 хүний амь үрэгдсэн юм. Ослоос 8 аврагч амьд үлдэн ГССҮТ-т эмчлүүлж байсан ч онгоцыг жолоодож явсан гавьяат нисгэгч өвчнөө дийлгүй амьсгал хураасан. Ихэнх нь нуруу нугас, гар хөлөндөө хүнд бэртэл авцгаасан гэдэг.
Ослоос амьд үлдсэн Ж.Бадамжунай “Нэг нөхрийн минь бөгсөн бие тасарчихаад "Намайг гайгүй бэртсэн гэж ар гэрийнхэнд минь хэлээрэй" гээд амьсгал хураасан. Хариуд нь хүн юу гэж хэлэхээ мэддэггүй юм билээ. Дэмий л "Яалаа гэж дээ" л гэхээс өөр үг олдоогүй” хэмээн ярилцлага өгсөн байдаг.
Осол болсон тэр жилийн “хар” өдрөөс хойш арван жил өнгөрчээ. Гэсэн ч албан үүргээ гүйцэтгэж яваад амь үрэгдсэн эрэлхэг хөвгүүдээ Монголын ард түмэн мартах учиргүй.
Г.Тэгшсүрэн
Уншиж байна |