Монгол Улсын Ерөнхийлөгчийн сонгуулийн урьдчилсан дүн хараахан гараагүй байна. 1.9 сая сонгогчийн 1.3 сая нь буюу 66.54 хувийн ирцтэйгээр энэ удаагийн сонгууль явагдсан талаар СЕХ-ны дарга Ч.Содномцэрэн мэдээллээ.
Сонгуулийн санал хураалтын талаарх хэсгийн хороодоос ирүүлсэн урьдчилсан дүнг СЕХ дэлгэцээр шууд дамжуулан үзүүлж байна. Нийт 1984 сонгуулийн хэсгийн хорооноос одоогийн байдлаар 1971 нь санал хураалтын урьдчилсан дүнгээ СЕХ-нд ирүүлээд байна. “Алслагдсан аймаг сумд интернэт сүлжээнд холбогдоогүй. Хэсгийн хороонд дүнгээ нэгтгэн аймаг, дүүрэг рүүгээ мэдээллээ дамжуулдаг. Сүлжээ орсон газарт очиж, мэдээллээ түгээж байгаа” гэдгийг СЕХ-ны дарга онцолж байсан юм.
Урьдчилсан санал хураалтын төлвөөр АН-наас нэр дэвшигч Х.Баттулга саналаараа тэргүүлж, МАХН-аас нэр дэвшигч С.Ганбаатар МАН-аас нэр дэвшигч М.Энхболдоос саналын тоогоор илүү явж байсан юм.
Харин үүрийн 03.50 цагаас хойш ирүүлсэн дүн мэдээллийн МАН-аас нэр дэвшигч М.Энхболд С.Ганбаатараас сонгогчдын саналын тоогоор түрүүлж эхэлсэн.
Тодруулвал, нэр дэвшигчдийн тухайд урьдчилсан байдлаар МАН-аас нэр дэвшигч М.Энхболд 410137, АН-наас нэр дэвшигч Х.Баттулга 516419, МАХН-наас нэр дэвшигч С.Ганбаатар 409690 сонгогчийн санал авсан үзүүлэлтэй байна. Баян-Өлгий аймгийн 7 хэсгийн хороо, Говь-Алтай, Завхан аймгаас тус тус нэг хэсгийн хорооны урьдчилсан дүн мэдээлэл хараахан ирээгүй байгаа юм.
Гэхдээ энэ удаагийн Ерөнхийлөгчийн сонгуулийн санал хураалт хоёр шатлалтай явагдах нөхцөл бүрдснийг СЕХ мэдээлсэн. Учир нь Ерөнхийлөгчийн сонгуулийн хуулиар аль нэг нэр дэвшигч сонгогчдын олонхийн санал аваагүй тохиолдолд дахин санал хураалт явуулах бөгөөд холбогдох байгууллага 14 хоногийн дотор хугацааг товлох заалттай.
Санал хураалтын урьдчилсан дүнгээр АН-наас нэр дэвшигч Х.Баттулгатай МАН-ын нэр дэвшигч М.Энхболд эсвэл МАХН-наас нэр дэвшигч С.Ганбаатар хоёрын нэг нь хоёр дахь шатны санал хураалтад өрсөлдөх төлөвтэй байна.
04:00 цагийн байдлаар
Н.Энх