Монголчууд түүхэндээ анх удаа Ерөнхийлөгчөө дахин “сонгоно”

Монголын ард түмний хувьд тав дахь Ерөнхийлөгчөө сонгох түүхэн өдөр өчигдөр /2017.06.26/ тохиолоо. Булхай луйвар, мөнгө тараасан, өгсөн авсан гэх маргаан дунд бид Төрийн тэргүүнээ сонгох төрт ёсны сонгуулиа өгсөн.

Санал өгөх насны 1.9 сая сонгогчийн 1.3 сая нь буюу 66.54 хувь нь энэ удаагийн сонгууль оролцож, иргэний үүргээ биелүүлэв. Эдгээр иргэний 517478 нь АН-аас нэр дэвшигч Х.Баттулгад, 411748 нь МАН-аас нэр дэвшигч М.Энхболдод, 409899 нь МАХН-аас нэр дэвшигч С.Ганбаатарт саналаа өгчээ. Гурван нэр дэвшигчийн хэн нэгэн нь нөгөө хоёроосоо “гойд” тэргүүлж чадаагүй тул дахин санал хураалт явуулах тухай асуудал яригдаж байна.

Тодруулбал Монгол Улсын Үндсэн хуулинд хэн нь ч олонхийн санал буюу 50+1 хувийн санал аваагүй бол дахин санал хураалт явуулдаг гэж заасан. Иймд саналын тоогоор АН-аас нэр дэвшигч Х.Баттулга тэргүүлсэн хэдий ч МАН-аас нэр дэвшигч М.Энхболд нар дахин өрсөлдөхөөр болоод байна.

Монгол Улсын Ерөнхийлөгчийн сонгуулийн түүхэнд анх удаа дахин санал хураалт явагдах нөхцөл байдал үүсээд байгаа нь энэ. Хуульд зааснаар хамгийн өндөр оноо авсан хоёр нэр дэвшигч хоёр дахь шатны сонгуульд дахин өрсөлдөх эрхтэй бөгөөд 14 хоногт багтаан санал хураалтыг СЕХ-ноос зохион байгуулах ёстой.

Нэгэнт дахин санал хураалт явуулах учраас хугацаа, хөрөнгө мөнгө орно. Гэтэл удахгүй үндэсний их баяр наадам болох гээд байдаг. Дахин санал хураалт явуулж, шинэ ерөнхийлөгчөө сонгох гэсээр наадам болох вий. Тэгээд Ерөнхийлөгч Ц.Элбэгдорж наадмыг нээж, индер дээрээс үг хэлээд дахиад нэг дэвэх нь гэдгийг олон нийт хэлж байна.

Шинэ Ерөнхийлөгч тангараг өргөснөөр өмнөх ерөнхийлөгчийн бүрэн эрх дуусна. Бид хоёр дахь шатны санал хураалтад ирцээ 50 хувьд хүргэхгүй бол Ц.Элбэгдорж Ерөнхийлөгч ажлаа хийж л байна.

Нийслэлд Х.Баттулга орон нутагт М.Энхболд, С.Ганбаатар нар ялалт байгуулав

Нэр дэвшигч Х.Баттулга өөрийн төрсөн нутаг болох Баянхонгор аймаг болон Нийслэлийн 7 дүүрэгт ялалт байгууулжээ. Мөн  хилийн чанад дахь монголчуудын 2979 буюу 63.28 хувь нь түүнд саналаа өгсөн нь санал хураалтын тоогоор тэргүүлэхэд чухал түлхэц болов.

Харин МАН-аас нэр дэвшигч М.Энхболдыг төрөлх нутаг Төв аймгийн ард иргэд /16,546/ “торойтол” дэмжсэн бол Баян-Өлгий, Увс, Ховд, Завхан, Говь-Алтай, Хөвсгөл,Сэлэнгэ,  Өвөрхангай, Сүхбаатар зэрэг 9 аймаг, Багахангай дүүрэгт мөн ялалт байгуулжээ.

МАХН-аас нэр дэвшигч С.Ганбаатар ч мөн 10 аймаг, нэг дүүрэгт ялалт байгуулав. Түүнийг Архангай, Булган, Говьсүмбэр, Дархан-Уул, Дорноговь, Дорнод, Дундговь, Орхон, Хэнтий, Өмнөговь , Налайх дүүрэгт  ялалт байгууллаа.

Г.Тэгшсүрэн