УИХ-ын гишүүн Д.Гантулга зургадугаар сарын 12-ны өдөр 25 настай С гэгчийг хүчиндсэн хэрэг гарсан тухай мэдээлэл гарч, хууль хяналтын байгууллагаас уг хэргийг шалгаж эхэлсэн. УИХ-ын гишүүн Д.Гантулгатай холбоотой хүчингийн хэргийг прокуророос хэрэгсэхгүй болгож, хаасан тухай хүний эрхийн хуульч М.Ичинноров мэдээлэл хийлээ.
Тэрбээр “УИХ-ын гишүүний захиалгаар Шүүх шинжилгээний үндэсний хүрээлэнгийн удирдлагууд эд мөрийн баримт, нотлох баримт устгасан байж болзошгүй, хэргийн нотлох баримтыг хуурамчаар бүрдүүлсэн байж болзошгүй гэж үзэж Авлигатай тэмцэх газарт хандаж байгаа юм. Зургадугаар сарын 12-ны өдөр хэрэг үйлдэгдсэн. Тэр өдрөө хохирогч цагдаад хандсан. Цагдаа нар ор хөнжлийн даавуу, хохирогч бүсгүйн дотуур хувцсыг шинжилгээнд өгсөн. Шинжилгээний хариу зургадугаар сарын 15-нд гарсан. Шинжилгээгээр эр бэлгийн эс илэрсэн гэдэг хариуг утсаар танилцуулсан. Тухайн өдөр шинжилгээ хийсэн Даваасүрэн гэх эмч ажлаасаа чөлөө авч, Оюун гэх эмч оронд нь томилогдож ажилласан. Эр бэлгийн эс илэрсэн гэсэн тэмдэглэгээг Шүүх шинжилгээний хүрээлэнгийн хуудсанд арилгаад өөр тэмдэглэгээ хийсэн байсан. Иймд АТГ-т үнэн мөнийг тогтоож өгөхийг хүсч хандаж байна. Эд мөрийн баримтыг устгасан, нотлох баримтыг хуурамчаар үйлдсэн эсэхийг тогтоож өгөхийг АТГ-аас хүсч өргөдөл өгч байна” хэмээлээ.
Хохирогч С-ын эгч Ч.Саранзаяа “Дүү маань хоёр удаа амиа хорлох оролдлого хийсэн. Эхлээд машинаа бариад давхисан. Дараа нь гарынхаа судсыг ханасан. Хэрэг шийдэгдэхгүй хаагдах бололтой гээд сэтгэл санаа нь маш хүнд байгаа. Дөрөв хоногийн өмнө УИХ-ын Д.Гантулга тохиролцох санал тавьсан” гэв.
Цаашид Ерөнхийлөгч, УИХ-ын дарга, УИХ-ын хууль зүйн байнгын хороонд УИХ-ын гишүүн Д.Гантулгыг эргүүлэн татах хүсэлтийг тавих ажээ.
Г.Тэгшсүрэн