Дэлхийн хамгийн урь түгжрэл Өмнөговьд үүсээд буй талаар бид өмнө мэдээлсэн. Тавантолгойгоос Ганц модны боомт хүртэлх 250 км замын 160-т нь түгжрэл үүсч, жолооч нар зам дээр 10 гаруй хонож буй талаар мэдээлж байсан. Өнөө ч энэ асуудал цэгцрээгүй байна. Тиймээс Цэцийн хөдөлгөөн ТББ-ынхан зам хааж, тайван жагсаал хийхээр болжээ. Өнөөдөр өнөөдөр 12.00 цагт эхлэх аж. Энэ талаар Цэцийн хөдөлгөөн ТББ-ын тэргүүн А.Бүддоржоос тодрууллаа.
-Жагсаал хийх талаар мэдээлэл авлаа. Ямар зорилгоор жагсаал хийх болов?
-Яг одоо 12.00 цагт хил хааж, тайван жагсаал хийх гэж байна. Жагсаалд 400 гаруй хүн оролцоно. Бид 2000 гаруй жолоочтой уулзаж, 1000 гаруй хүний гарын үсэг цуглуулаад байна. Уртын урт тээвэр буюу Тавантолгойгоос Ганц модны боомт хүртэл явж байгаа нь хүндрэлтэй ийм асуудал үүсгээд байна. Харин Тавантолгойгоос Цагаан хаданд буулгаад тэндээсээ Хятад руу тээвэрлэдэг болмоор байна. Өмнө нь ингэж тээвэрлээд болдог байсан. Бид ийм шаардлагыг тавина. Мөн бид жолооч нарын цалинг нэмэх шаардлагыг тавих юм.
-Хилийн нөхцөл байдал ямар байна. Хятадын хил дээр яагаад ийм асуудал үүсэв?
-Монголын жолооч нарыг хориотой эд зүйлс хилээр гаргасан гэсэн үндэслэлээр хилээ улам чангатгаад байна. Гар буу, алтан бурхан, хүүхэн гаргасан гэх зүйл ярьж байгаа. Гэвч үнэхээр жолооч нар тийм зүйл гаргасан уу, хэн гаргасан гэдэг нь тодорхойгүй. Өдөрт хилээр 1 000 машин гардаг байсан. Харин одоо ихдээ л 100 машин гарч байна. Нэг машиныг 30-40 минут шалгаж, маш их цаг алдаж байна. Жолооч нар зам дээр 10 гаруй хонож байна.
-Олон машины түгжрэл үүссэн нь цөөнгүй хүний бөөгнөрөл үүсгэж байгаа. Одоо хичнээн жолооч байна. Эмх замбараагүй нөхцөл байдал үүсч байна уу?
-6420 жолооч байна. Цагдаагийн байгууллагаас гэмт хэрэг, зөрчил гараагүй гэсэн мэдээлэл өгсөн. Гэсэн ч жолооч нар шороон замаар явах тохиолдол их гарч байна. Ингэж хулгайн замаар явах нь жолооч нарын дунд зөрчил үүсгэж магадгүй.
В.Бат