Эв санааны нэгдэл үйлдвэрчний эвлэлийн дарга С.Эрдэнэ өлсгөлөн зарлажээ. Тэрбээр Эрдэнэс Тавантолгой компанийн ажилчдын кемпдээ энэ сарын 20-ноос эхлэн өлсгөлөн зарласан байна. Эв санааны нэгдэл үйлдвэрчний эвлэлийн гишүүнийг нь ажлаас хууль бусаар халсан учраас тэрбээр гишүүдийнхээ эрх ашгийг хамгаалах үүргийнхээ үүднээс өлсгөлөн зарласан байна.

Мөн тэрбээр "Эрдэнэс Тавантолгой" ХК-ийн гүйцэтгэх захирал Д.Ариунболдыг ирж уулзаж, асуудлыг газар дээр нь шийдвэрлэх шаардлагыг хүргүүлээд буй аж. Энэ сарын 20-нд тавьсан энэ шаардлагын хариуг өнөөдөр ч өгөөгүй байгаа учраас өлсгөлөнгөө хугацаагүй үргэлжлүүлнэ гэдгээ С.Эрдэнэ хэлж байна.

 “Эрдэнэс Тавантолгой" ХК-ийн В ээлжийн оператор Л.Ариунсанг хууль бусаар ажлаас нь халсан аж.  “Эрдэнэс Тавантолгой” ХК-ийн туслан гүйцэтгэгч компанийн дарга, уурхайн үйлдвэрлэл хариуцсан дарга Азжаргалын энэхүү шийдвэрийг эсэргүүцэж, Л.Ариунсан өөрөө дөрвөн өдөр өлсгөлөн зарласан аж. Гэвч шийдвэр цуцлагдаагүйн дээр суурь өвчний улмаас өлсгөлөнгөө үргэлжлүүлэх боломжгүй болжээ. Тиймээс гишүүдийнхээ эрх ашгийг хамгаалж, асуудлыг шийдэх үүднээс  Эв санааны нэгдэл үйлдвэрчний эвлэлийн дарга С.Эрдэнэ үргэлжлүүлэн өлсгөлөн зарлаж буйгаа хэллээ.

В.Бат