Голомт банкны эдийн засагчид, эдийн засагч судлаач болон гадаадын мэргэжилтнүүдтэй хамтран зээлийн хүүг бууруулах үндэсний старатегийг боловсруулжээ.  Энэ талаар өнөөдөр мэдээлэл хийлээ.

Зээлийн хүүг бууруулах стратегийг хэрэгжүүлснээр 19 хувьтай байгаа банкны хүүг тодорхой хугацааны дараа 9 хувь хүртэл буулгах боломжтой байгааг Голомт банкны гүйцэтгэх захирал Ө.Ганзориг хэлэв.  Мөн тэрбээр Монгол Улс макро болон микро эдийн засгийн түвшинд 20 орчим алхмыг хийж байж зээлийн хүүг нэг оронтой тоо руу оруулж, буулгах боломжтойг дуулгав.

Зээлийн хүү яагаад өндөр байна вэ?

Зээлийн хүү бол эдийн засгийн эрүүл мэндийг харуулдаг үзэгдэл. Зээлийн хүүг хэн нэгэн сайн дураараа тогтоохгүй. Бид зээлийн хүү яагаад өндөр байгааг олон талаас нь судалж, таамаглал дэвшүүлсэн. Энэ таамаглал маань батлагдсан.

Өнгөрсөн 27 жилийн турш гадаад валютын эсрэг төгрөгийн ханшийг хамгаалахын тулд төгрөгийн үнэ болох зээлийн хүүг зориуд өндөр түвшинд барьж ирсэн. Банкууд дээр төгрөгийн хадгаламжийн хүү жилийн 15 хувь байна. Долларын хадгаламж жилийн 6 хувийн хүүтэй. Бид хүчээр төгрөгийн хадгаламжийн хүүг 6 хувь болгон бууруулбал хүмүүс төгрөгөө зараад долларын хадгаламж болгоно. Энэ нь иргэдийн төгрөгт итгэл итгэл сул байгааг харуулна.

Төгрөгийн зээлийн хүүг бууруулах тулд хийх үндсэн стратеги бол төгрөгийн долларын эсрэг чадавхийг сайжруулах, төгрөгийн ханшийн хэлбэлзлийг тогтворжуулах алхмыг хийх ёстой.

Монголын эдийн засаг суурь өвчтэй болсон. Төгрөгийн ханш гадаад валютын эсрэг байнга сулардаг. 1990 онд бидэнтэй адил социалист улс байгаад чөлөөт зах зээлд шилжсэн улсуудтай харьцуулж үзсэн. Ингэхээр манай улсын эдийн засаг хамгийн доод түвшний таван хувьд байна. Тэр улсуудын ихэнхийнх нь зээлийн хүү нэг оронтой тоонд орсон. Үндэсний мөнгөн тэмдэгтийнх нь ханш долларын эсрэг 2450 гэсэн тоогоор яригдахгүй байна гэсэн мэдээллийг  Ө.Ганзориг өглөө.

В.Бат