АТГ Олон нийтийн төвөөрөө дамжуулан сар бүрийн 25-нд мэдээлэл хийж байхаар болжээ. Анхны мэдээллээ өнөөдөр хийж, хуулийн хэрэгжилт, зохион байгуулсан ажил, олны анхаарал татсан хэргийн мөрдөн байцаалтын явцын талаар мэдээлэл өглөө. Мэдээллээс олны анхаарал татсан хэргүүдийн талаарх мэдээллийг онцлон та бүхэнд хүргэж байна. АТГ-ын Мөрдөн шалгах хэлтэс өнөөдрийн байдлаар 111 хэрэгт мөрдөн байцаалтын ажиллагаа явуулж буй аж.
60 тэрбумын хэргээр төрийн 1400 албан хаагчаас байцаалт авчээ
МАН-ын эрх бүхий албан тушаалтнууд төрийн албыг наймаалцаж, 60 тэрбум төгрөг босгох тухай бичлэгтэй холбоотой хэргийг АТГ шалгаж байна. 2016 оны VIII сард нийслэлийн Прокурорын газраас эл асуудалд эрүүгийн хэрэг үүсгэхээс татгалзсан байдаг. Нийслэлийн прокурорын энэхүү татгалзсан шийдвэрийг Улсын Ерөнхий прокурорын орлогчоос 2017 оны VII сарын 25-нд эрүүгийн хэрэг үүсгэж, харьяаллын дагуу ирүүлсэн. Энэ хэрэг дээр ТЕГ, ЦЕГ, АТГ-ын хамтарсан ажлын хэсэг ажиллаж байна.
Бичлэгт нэр дурдагдсан хүмүүсийг байцааж, шалгаж буй. Мөн 2016 оны сонгуулиас хойш төрийн албанд дэвшсэн болон шинээр томилогдсон 1400 гаруй хүнээс байцаалт авчээ. Энэ нь байцаалт авах нийт хүний 90 хувь нь юм байна. Бас УИХ-ын дарга М.Энхболдоос тайлбар мэдээлэл авчээ. 2016 оноос хойш өнөөдрийг хүртэл шүүх шинжилгээний байгууллагаас дуу хоолойтой холбоотой дөрвөн төрлийн шинжилгээ хийгдсэн байна. Энэ асуудлаар прокурор дахин шинжээч томилж, эвлүүлэг мөн эсэхийг шалгаж буй аж.
90 минутын бичлэг 162 болсон. 2014 оны VIII сарын 28-нд бичигдсэн байж болзошгүй 40 минутын бичлэг гарч ирсэн. Мөн саяхан 5 минутын бичлэг гарч иржээ. Энэ бүх бичлэгүүдийг шалгах, шинжлүүлэх, нэр дурдагдсан хүмүүсээс байцаалт авах ажиллагаа прокурорын хяналтан дор явагдаж байна.
Оффшорын хэргийн шалгалт үргэлжилж байна
Монгол Улсын 49 иргэн, аж ахуйн нэгжийн нэр оффшор данстай холбогдож буй. Тэднийг нарийвчлан шалгахад 29 иргэн 35 аж ахуйн нэгж оффшор бүсэд бүртгэлтэй байгаа аж. Энэ 29 иргэнээс 23 нь төрийн албанд ажиллаж байсан болон хамааралтай байна. Энэ асуудалд Улсын Ерөнхий прокуророос эрүүгийн хэрэг үүсгэж, АТГ, ЦЕГ-ын хамтарсан ажлыг хэсэг шалгаж байна. Энэхүү хэрэгт нэр дурдагдсан хүмүүсийг дуудаж, байцаалт авч буй аж.
Энэ чиглэлээр гадаадын байгууллагуудад хамтран ажиллах чиглэлээр 7-8 хүсэлт хүргүүлсэн байна. Одоогоор хоёр хүсэлтийн хариу иржээ. Мөн Ерөнхийлөгчид хэргийн явцын талаар мэдээлэл хүргүүлсэн байна.
У.Хүрэлсүх өөрийгөө тагнаж чагнасан уу
Шадар сайд тагнаж чагнасан, мөрдсөн гэх хэргийг мөн АТГ шалгаж буй. Уг хэрэгтээ холбогдуулан 9 хүнийг шалгаж байна. Шадар сайд У.Хүрэлсүх 2017 оны VII сард төрсөн дүү Отгонбаяр, өөрийн хамаатнаараа дамжуулан өөрийгөө мөрдөн мөшгисөн гэх мэдээллийг хэвлэл мэдээллийн хэрэгслээр тараасан. Үүнтэй холбогдуулан Шадар сайд У.Хүрэлсүхийг яллагдагчаар татах саналыг нийслэлийн прокурорын газарт хүргүүлжээ.
Харин эл хэргийн захиалагч нь Ерөнхий сайд Ж.Эрдэнэбат гэх үйлдэл тогтоогдоогүй аж. Мөн энэ хэргээр дөрвөн хүн цагдан хоригдож буй юм.
Хөгжлийн банкны Н.Мөнхбатын хэргийг шүүхэд шилжүүллээ
Хөгжлийн банкны хэргийн мөрдөн байцаалтын ажиллагаа явагдаж байна. Хэргийн хүрээнд гурван багц асуудлыг шалгаж байна. Мөрдөн байцаалтаар албан тушаалаа урвуулсан, хэтрүүлсэн, бусдад давуу байдал олгосон гэх үндэслэлээр ЦЕГ-тай хамтарсан ажлын хэсэг шалгалтыг үргэлжлүүлж буй. Б.Шинэбаатар, Н.Мөнхбат нартай холбоотой эхний үйлдлийг нь тусгаарлаж, шүүхэд шилжүүлсэн байна.
Монголбанкны Ерөнхийлөгч асан Н.Золжаргалыг шалгаж эхэлсэн. Түүнтэй холбоотой хэргийг АТГ болон ЦЕГ-ын эдийн засгийн гэмт хэргийн хэлтсийн хамтарсан ажлын хэсэг шалгаж буй. Мөн Зам тээврийн сайд асан А.Гансүхтэй холбоотой хэрэг шүүхээс АТГ-т буцаж ирсэн байна. Тус хэрэгт нэмэлт мөрдөн байцаалтыг хийж, прокурорын хяналтад шилжүүлжээ.
В.Бат