Шадар сайд У.Хүрэлсүхийг тойрсон асуудал үргэлжилж байна. Ерөнхий сайд Ж.Эрдэнэбатын захиалгаар Шадар сайдыг тагнасан гэх нөхцөл байдал өөрчлөгдөж, одоо У.Хүрэлсүх өөрийгөө тагнаж, чагнасан хэрэгт ороод буй. Төрийн эрхийг хууль бусаар авах гэмт хэрэг үйлдсэн учраас яллагдагчаар татах саналыг АТГ-аас прокурорын байгууллагад хүргүүлсэн.
Эл асуудлаас үүдэн тэрбээр Ерөнхий сайд Ж.Эрдэнэбаттай хамтран ажиллах боломжгүй боллоо хэмээн Шадар сайдын албанаас чөлөөлөгдөх хүсэлтээ энэ сарын 17-нд гарсан. Гэвч энэ асуудлыг өнөөг хүртэл шийдэгдээгүй байна. Ерөнхий сайд Ж.Эрдэнэбат энэ асуудлаар Ерөнхийлөгчид бичиг илгээж, зөвшилцөхийг хүссэн аж. Харин Ерөнхийлөгч түүний саналыг буцааж, шаардлагатай баримт материалыг бүрэн ирүүлсэн тохиолдолд зөвшилцөнө гэх хариуг өнөөдөр өглөө. Гэхдээ У.Хүрэлсүхийн чөлөөлөгдөх хүсэлт Ерөнхийлөгчид хамаатай юу, Ерөнхий сайд танхимын нэг сайдынхаа хүсэлтийг шийдвэрлэх эрх мэдэлгүй юу гэх асуулт байна. Ямартай ч энэ асуудал дахин багагүй хугацаанд сунжрах нь тодорхой боллоо.
МАН-ын их хурал ирэх сард болох сураг бий. Тодорхой товгүй ч энэ хурлаар МАН-ын дарга М.Энхболдод хариуцлага тооцох асуудал яригдана. Харин түүний суудалд хэн залрах вэ. Энэ суудлын төлөөх тэмцэл өнөө ч үргэлжилж байна. Намын дарга нь Ерөнхий сайд болдог жамаас хазаасан М.Энхболд өөрийн хүн болох Ж.Эрдэнэбатаа зүтгүүлэх нь мэдээж. Харин нөгөө талд У.Хүрэлсүх гэх хүчтэй өрсөлдөгч бий. Шадар сайд У.Хүрэлсүх “Өнөөдөр” сонинд өгсөн ярилцлагадаа “Тийм ээ, би намын даргын сонгуульд итгэл төгс өрсөлдөнө. Ардын нам бол ард түмний нам болохоос олигарх цөөнхийн өмч байж болохгүй” хэмээн МАН-ын даргын суудлын төлөөх өрсөлдөөний гадна үлдэхгүйгээ зарлалаа. Мөн тэрбээр намынхаа өөрчлөлт шинэчлэлтийг монголчуудтай хамтдаа хийж, тэмцэнэ хэмээн ард түмний дэмжлэгийг авна гэдгээ ч хэлжээ.
В.Бат