Багш нар энэ сарын 21, 26-ны өдөр сануулах ажил хаялт зарлахаа хэвлэлийн хурал хийж мэдэгдэв. Өнгөрсөн сарын 30-нд Сүхбаатарын талбайд 10 000 багш цуглаж, цалингаа 1.6 сая төгрөгт хүргэхийг шаардаж, Засгийн газарт шаардлагаа хүргүүлсэн. Тэд энэ сарын 15-нд шаардлагын хариугаа авах ёстой байсан ч Засгийн газар дуугараагүй аж. Багш нарын цалинг нэмэгдүүлэх түр хорооныхон “Засгийн газар хариу өгсөнгүй, хүлээж авсангүй” гэсэн мэдэгдлийг хийлээ.
Тэдний шаардлагыг хүлээн авах, хариу өгөх, цалинг нь нэмэх Засгийн газар бий билүү. Ж.Эрдэнэбатын Засгийн газар огцроогүй байхдаа л багш нарын цалинг нэмэх боломжгүй, 2018 оноос судалж үзнэ гэх хариуг өгч байсан. Улсын төсөв мөнгө хэцүү байгаа учраас нэмэх бус судалж үзнэ гэж багш нарыг аргадсан. Харин өнөөдөр тэр Засгийн газар нь үүрэг гүйцэтгэгч. Шинэ Ерөнхий сайдыг томилогдохыг, дараагийн Засгийн газар байгуулагдахыг хүлээж суугаа хүмүүс. Багш нарын шаардлагыг хүлээж аван, цалин нэмэх шийдвэр гаргах боломжгүй. Товчхондоо буцах бэрд үхэр, тугал нийлэх нь падгүй асуудал.
Ийм нөхцөлд багш нар ажил хаях нь хэнийг хохироох гэсэн санаархал вэ?! Энэ сарын 21, 26-нд хийх багш нарын ажил хаялт ямар ч үр дүнд хүрэхгүйг хэн хүнгүй мэднэ. Тэднийг сонсох салбарын сайд ч үгүй, Засгийн газар ч байхгүй. Харин дараагийн Засгийн газар байгуулагдсаны дараа ажил хаяж “айлгасан” бол асуудал Засгийн газрын танхимд яригдаж болох юм. Шинэхэн Ерөнхий сайд энэ асуудалд анхаарал хандуулж, мөнгөгүй ч цалинг чинь нэмнэ гэж попорч магадгүй.
Цалингаа нэмүүлж, амьдралаа дээшлүүлэхийг хүссэн багш нарын тэмцлийг үгүйсгэхгүй. Тэд бусадтай адил хөдөлмөрөө үнэлүүлэх ёстой. Үнэ дагаж чанар гэдэгчлэн багш нар ч өндөр цалинтай бол ажилдаа илүү сэтгэл гаргах биз. Гэхдээ яг одоо тэмцэл хийх цаг нь биш. Монголын улс төр, эрх баригч нам сэмхэн уулзаж, нам хуйвалдсан өнгө аястай. Багш нарын тэмцэл, өвлийн бэлтгэл, улс орны эдийн засгийн нөхцөлд санаа зовних бус бялуугаа хэрхэн хуваахад гол анхаарлаа хандуулж байна. Тэдэнд багш нар 500 мянган төгрөгийн цалинтай байх нь, өрөндөө баригдаж байна уу, Солонгос руу хар ажил хийхээр явж байгаа эсэх нь хамаагүй. Тиймээс Ж.Эрдэнэбатын бус дараагийн Засгийн газарт үгээ хүргэхийн төлөө явах нь илүү чухал. Сануулах ажил хаялт үүрэг гүйцэтгэгч Засгийн газартай хамт үр ашиггүй өнгөрнө. Багш нар ардын хүүхдийг сургаж, хүмүүжүүлэх үүргээ умартсан муу нэртэй л үлдэнэ.
Харин ирэх аравдугаар сарын эхээр Засгийн газар байгуулагдахтай зэрэгцэн ажил хаявал эрх баригчид энэ асуудалд анхаарал хандуулж магад. Хэний фракцийн хэн Боловсролын сайд болохоос мөн л хамааралтай.
Магад, магадгүй хэмээн таамагласны учир нь багш нарын хүсч байгаа шиг цалинг нь 1.6 сая төгрөг хүргэх чадал Монголын төрд бий болов уу.
В.Бат