Ерөнхий боловсролын сургууль болон цэцэрлэг, МСҮТ-ийн багш нар өнөөдөр ажил хаялт зарлалаа. Тэд цалингаа нэмүүлэхийн тулд төр засагт ийм сануулга өгч буй юм. Монголын боловсролын түүхэнд багш нар ажил хаяж буй тав дахь тохиолдол нь энэ.
Энэ ажил хаялтад төрийн өмчийн сургууль, цэцэрлэгийн 80 хувь нь оролцоно гэх мэдээллийг Багш нарын цалин нэмүүлэх түр хорооноос мэдээлж байсан. Гэвч сурагчдаа дуудаж, хичээлээ хийж буй цөөнгүй сургууль байна. Багш нарын цалинг нэмүүлэх түр хорооноос мэдээлж буйгаар БСШУСЯ болон дүүргүүдийн Боловсролын хэлтсийнхэн сургуулиуд дээр очиж, багш нартай уулзаж, хичээлээ орохыг шаардсан байна. Мөн сургуулийн захирлууд ч шөнөжингөө багш нараа дуудаж, хичээлээ орохыг шаардаж, дарамталсан гэв. Тухайлбал, Сонгинохайрхан дүүргийн 76 дугаар сургуулийн багш нар ажил хаясан. Тэднийг хичээлээ заахыг шаардаж, төр засагт хүндрэл учруулахгүй байхыг дүүргийн Боловсролын хэлтсээс нь хүссэн гэнэ. Мөн тус сургуулийн 9 багш ажил хаяхаас татгалзсан байна.
Багш нар цалингаа 1.6 сая төгрөгт хүргэхийг шаардаж буй. Гэвч төрийн зүгээс боломжгүй гэсэн хариултыг өгснөөс үүдэн багш нар ажил хаяад байгаа юм. Тэд энэ сарын 26-нд мөн ажил хаяхаа мэдэгдсэн билээ.
В.Бат
Уншиж байна |