Багш нарын ажил хаялт үргэлжилж байна. Энэ сарын 21-нд эхэлсэн сануулах ажил хаялт өнөөдөр хоёр дахь удаагаа болж байна. Ерөнхий  боловсролын сургууль болон цэцэрлэг, МСҮТ-ийн багш нар цалингаа 1.6 сая төгрөг болгохын төлөө тэмцэж буй юм. Багш нарын цалин нэмүүлэх түр хорооны гишүүн Т.Пүрэвсүрэнгээс ажил хаялтын талаар тодрууллаа.

-Өнөөдрийн ажил хаялтын талаар мэдээлэл өгөөч. Бүх сургууль, цэцэрлэг хамрагдсан уу?

-Нийслэлийн ЕБС-ийн 90 хувь нь ажил хаялтад нэгдээд байна. Харин цэцэрлэгүүдийн тухайд хангалтгүй байна. Цэцэрлэгийн эрхлэгч нарын дарамт шахалтаас үүдэж, багш нар ажил хаялтад дахиж оролцож чадсангүй.

-Аймгуудын тухайд оролцоо хэр байна вэ?

-Увс, Сүхбаатар, Хэнтий, Баянхонгор, Говь-Алтай, Дархан, Орхон, Дундговь, Хөвсгөл аймгуудын сургуулиуд хангалттай оролцож байна. Говьсүмбэр, Дорнод аймгийн багш нарт нэлээд дарамт учирсан гэх мэдээлэл ирсэн.

-Ямар дарамт үзүүлдэг юм бол?

-Засаг дарга, боловсролын газар, хэлтсээс нь ирж, ажлаас нь хална гэж дарамталж байна. Зарим аймагт бүр гэр бүлээр нь дарамталсан тохиолдол бий. Бид үүнийг хууль бусаар багш нарын эрхэнд бүдүүлгээр халдсан үйлдэл гэж үзэж байгаа.

-Засгийн газар, яамны зүгээс та нартай холбогдсон уу?

-Одоогоор холбогдоогүй байна. Яам бол анхнаасаа л бидэнтэй тэмцсэн. Ажил хаясан сургууль, цэцэрлэгийн удирдагуудыг дарамталж байна. Багш нарынхаа эрх ашгийг хамгаалсан захирал, эрхлэгч нар халагдсан яахав гээд бидэнтэй нэгдсэн байгаа.

-МҮЭХ-той хамтран хамтын маргаан үүсгэж байгаа гэсэн. Энэ асуудал ямар шатандаа яваа бол?

-Бид өнөөдөр олон улсын арбитрын шүүхэд материалаа илгээнэ. Арбитрт хандаад, хамтын маргаан эхэлсэн тохиолдолд ажил хаях боломжгүй юм билээ. Гэхдээ бид зорилгоосоо буцахгүй. Тэмцлийн өөр хэлбэрүүдийг сонгож, эрх ашгийнхаа төлөө явна.

-Тэгэхээр цаашид ажил хаях боломжгүй гэсэн үг үү?

-Тиймээ. Арбиртрын хууль дүрмийн дагуу боломжгүй. Гэхдээ хоёрдугаар улирлаас ажил хаях эрх нээгдэх юм билээ.

-Хичнээн багш та нартай нэгдээд байгаа вэ?

Ерөнхий боловсролын сургууль болон цэцэрлэгийн 44 000 багш тэмцэж байна. Мөн МСҮТ-үүдийн 2600, ХБК-ийн 158 багш нэгдсэн байгаа. Бас Урлан бүтээх төвийн багш нар бидэнтэй нэгдэхээ мэдэгдсэн.

В.Бат