Цагаан ордны тэргүүн Хойд Солонгосын эсрэг цэргийн ажиллагаа явуулах болно хэмээн мэдэгдлээ. Энэ талаар “www.telegraph.co.uk” сайт мэдээллээ.
АНУ-ын Ерөнхийлөгч Дональд Трамп өнгөрсөн долоо хоногт НҮБ-ын индэр дээрээс “Хойд Солонгос улсыг бүрэн устгах болно” хэмээн мэдэгдсэн билээ. Түүний энэхүү мэдэгдэл “олон улсад эмх замбараагүй байдал үүсгэхээс гадна Нэгдсэн улсын Ерөнхийлөгчийн амнаас гарч боломгүй өдөөн хатгалгын үг байсан” хэмээн дэлхий нийтээрээ Цагаан ордны тэргүүнийг буруутгасаар байна.
Мэдээж хэрэг Трампын өдөөн турхирсан мэдэгдлийн дараахан Хойд Солонгосын удирдагч Ким Чен Ун түүнийг “сэтгэцийн хувьд тогтворгүй” хэмээгээд “Та бүхэн тун удахгүй жинхэнэ цохилтыг мэдрэх болно” хэмээн заналхийлжээ. Трамп НҮБ-ын индэр дээрээс хэлсэн үгээ “зөв” хэмээн хамгаалсаар байгаа юм. Тэрбээр энэ долоо хоногийн эхээр Хойд Солонгос тэргүүтэй найман орны иргэдийг АНУ-д нэвтрэхийг хориглосон зарлигт гарын үсэг зурлаа.
НҮБ-ын Ерөнхий Ассамблейн чуулга уулзалтад оролцоод өчигдөр нутаг буцсан Хойд Солонгосын Гадаад хэргийн сайд Ри Ён Хо “АНУ эхэлж дайн зарлалаа. Та бүхэн эхэлсэн учир хариуцлага хүлээхэд бэлэн байх хэрэгтэй. Хоёр Солонгосын цэрэггүй бүс буюу Хойд Солонгосын хилээс холгүй эргүүлэг хийж буй АНУ-ын сөнөөгч онгоцыг бид устгах боломжтой гэсэн үг. Хэдий энэхүү сөнөөгч онгоц манай улсын хилийг зөрчөөгүй боловч стретагийн үүднээс устгах боломжтой” гэж мэдэгджээ.
Сайдын мэдэгдлийг дэлхийн хэвлэлүүд нийтэд түгээсний дараахан Цагаан ордны хэвлэлийн төлөөлөгч Сара Сандерс яаравчлан хэвлэлийн хурал хийв. Тэрбээр “АНУ хэзээ ч Хойд Солонгос улсад дайн зарлаагүй. Тиймээс санаатай өдөөн хатгалагаа нэн даруй зогсоо” гэсэн байна. Трамп, Ким Чен Ун нарыг нэг нэгнээ хорон үгээр турхирахгүй байхыг ОХУ-ын Гадаад хэргийн сайд Сергей Лавров, АНУ-ын Төрийн нарийн бичгийн дарга Рекс Тиллерсонтой уулзах үеэрээ мэдэгджээ.
Тэгвэл Трамп өчигдөр “АНУ, Хойд Солонгосын эсрэг цэрэг болон зэвсгийн хүч хэрэглэхэд бүрэн боломжтой. Бид бэлэн байдалд байна” гэв. Трамп өчигдөр Цагаан ордондоо Испанийн Ерөнхий сайд Мариано Рахойг хүлээн авчээ. Удирдагчид хагас цаг орчим ярилцсаныхаа дараа хэвлэлийнхэд хамтарсан мэдэгдэл хийх үеэр Трамп “Хойд Солонгосын эсрэг зэвсгийн хүч ашиглах боломжтой” гэж мэдэгджээ. Тэрбээр үргэлжлүүлэн “Бид Хойд Солонгосын эсрэг хоёр хувилбарыг хэрэгжүүлэхэд бэлэн байна. Аль болох энэ хоёр хувилбарыг хэрэгжүүлэхгүй хэмээн бодож байгаа ч Хойд Солонгосын заналхийлэл улам томорч, хяналтаас гарлаа. Үнэнийг хэлэхэд бид Хойд Солонгосыг сүйрүүлэхэд бэлэн байна” гэж хэлжээ.
Түүний дурдсан хоёр хувилбар хоёулаа Хойд Солонгосын эсрэг явуулах цэргийн ажиллагаанууд гэнэ.
“Хойд Солонгос хэтэрхий бардам, өөртэй итгэлтэй болсон нь АНУ-ын өмнөх тэргүүн нарын буруутай бодлогоос болсон” хэмээн Трамп мэдэгдээд “Энэхүү буруу бодлогыг өөрчилж, засах болно” хэмээн амлажээ.
“Цагаан ордны үе үеийн тэргүүн нар Хойд Солонгосын эсрэг томоохон алхам хийгээгүй учир энэ улс бидний хяналтаас гарсан” хэмээн Трамп Ерөнхийлөгчийн сонгуулийн үеэр мэдэгдсэн билээ.
Тэрбээр мөн “Хойд Солонгос улсад айлчилсан анхны АНУ-ын Ерөнхийлөгч болно” хэмээн иргэдэд мэдэгдэж байсан ч Трампын засаг захиргааны үед хоёр улсын дунд үүссэн харилцаа дайны хэмжээнд хүрээд буй юм.
“Аль ч Ерөнхийлөгчийн үед өнөөдөр үүссэн шиг сөргөлдөөн болж байгаагүй” талаар “CNN” агентлаг онцлон тэмдэглэв.
Б.Дэлгэрцэцэг
| Уншиж байна |