МАН-ын Ерөнхий нарийн бичгийн дарга Д.Амарбаясгалан сэтгүүлчдэд мэдээлэл хийж, тэдний сонирхсон асуултад хариуллаа. Тус намын бага хурал энэ сарын 25-нд хуралдаж, Ерөнхий сайдаар нэр дэвшигчид Шадар сайдын үүрэг гүйцэтгэгч У.Хүрэлсүхийг  батламжилсан билээ.

-МАН-ын даргын  тавьсан улс төрийн илтгэлд  төрийн албаны шахааг зогсоох ёстой гэж Ерөнхий сайдад нэр дэвшигч Засгийн газраа байгуулахдаа ямар бодлого барих бол?

-2016 оны сонгуулиар МАН бүх шатанд ялалт байгуулсан. Үүнтэй холбогдуулан төрийн болон улс төрийн  албанд МАН-ын гишүүд ,дэмжигчид нэлээд томилогдсон.   Намын бодлогын хүрээнд томилогдсон, сонгогдсон албан тушаалтан хэд вэ, холбогдох албан тушаалтнуудын хүрээнд томилогдсон нь хэд вэ гэдгийг илтгэлдээ  МАН-ын дарга дурдсан. МАН ард түмэндээ амласан мэргэжлийн Засгийн газрыг байгуулна, илүү өндөр хариуцлагатай байна, мөрийн хөтөлбөрөө хэрэгжүүлнэ гэж ярьж байгаа. Энэ хүрээндээ мэдлэгтэй, боловсролтой, чадалтай боловсон хүчнүүдээ төрд томилж ажиллуулна. Аливаа улс төрийн нам мөрийн хөтөлбөрөө хэрэгжүүлэх зарчим барьдаг.

Ер нь нэр дэвшигч маань өмнөх Засгийн газрын бүтцэд өөрчлөлт оруулахгүй гэдгээ хэлсэн. Өвлийн хүйтэн дөхөж байна.  Ард иргэдийн амьдрал ахуй хүндрэлтэй болж болзошгүй нөхцөл байдалтай үед  сандал ширээний хэрүүл хийгээд яамыг 2-3 хуваахыг болъё. .  Өмнө нь  боловсруулсан Засгийн газрын бүтэц, хөтөлбөрийг бариад бүрэлэхдүүнээ сайжруулж, чадавхижуулж, боловсон хүчний шинэчлэл хийх бодлогыг баримталж ажиллана гэж үзсэн. Боловсон хүчний шахаа гэдгийг шууд утгаар нь ойлгож  болохгүй. МАН 214637 гишүүнтэй гэсэн дүн 2016 онд гарсан байдаг. Энэ дундаас бид шаардлагатай байгаа албан тушаалд мэргэжилдээ дөхүү хүмүүсийг томилж ажиллуулах нь зөв гэж ярьж байгаа.

-Тэгэхээр Засгийн газрын бүтэц биш бүрэлдэхүүнд өөрчлөлт орно гэж ойлгож болох уу?

-Засгийн газрын бүрэлдэхүүнд өөрчлөлт орно. Ерөнхий сайдыг УИХ-аар оруулж батлуулсны дараагаар МАН-ын Удирдах зөвлөл дээр шинэ Засгийн газрыг байгуулах зарчмаа хэлэлцэнэ. Аливаа түвшинд зарчимтай байх нь бидний ажилд илүү нээлттэй, ил тод байх юм. Дэд сайдтай байх эсэхийг МАН-ын Удирдах зөвлөл дээр шийдэх ёстой гэж бодож байна. Олонхийн шүүмжлэл дагуулж байгаа зүйлээс ангид, ард түмний хүсэлд нийцүүлсэн томилгоог хийхэд анхаарна. Бид Монгол Улсын Ерөнхий сайдыг нэр дэвшүүлэх ажиллагааг олон нийтийн судалгаан дээр тулгуурлаж явуулсан.

-Ерөнхий сайдад нэр дэвшигч бондын төлбөр, багш, эмч нарын цалинг нэмэх эсэх асуудалд ямар байр суурь баримталж байна вэ? 

-Ерөнхий сайдад нэр дэвшсэн гурван хүн он гараад төлөх бондын 660 сая ам.долларын эргэн төлөлтийг хөндсөн.  Үндсэндээ нэг зүйл ярьсан. Бондыг төлнө, богино хугацаанд төлөх 2-3 аргыг Сангийн яам боловсруулсан байгаа юм билээ. Шинээр Засгийн газар байгуулагдахаар Сангийн сайдаар шинэ хүн гарч ирнэ. Санхүүгийн бодлого чиглэлээ УИХ дээр нэр дэвшигч нь тодорхой ярих байх. Зөвхөн багш, эмч нарын цалингийн нэмэгдэл биш төрийн албан хаагчдыг нэмэгдлийг 2018 оны төсөвтэйгээ уялдуулан нэмэх ёстой гэж ярьж байгаа. Энэ бол МАН-ын бодлого юм.  Монгол Улсад хохиролгүй байх нөхцөлийг бүрдүүлэхийн төлөө ажиллана.

-Шинэ Засгийн газарт өмнөх сайд нар орж ажиллах уу?

-Шинэ Засгийн газрын бүрэлдэхүүнд өмнөх сайд нарыг багтаах уу, шинэ сайд нарыг оруулах уу гэдэг тохиролцоо хийгээгүй.  Зөвхөн Ерөнхий сайдыг л тодруулахаар хэлэлцсэн. Албан тушаалын яриа явагдаагүй. Дараагийн Засгийн газарт хуучин сайд ч орж болно, бүгд шинэ байсан ч болно.  Мэргэжлийн хүн томилж ажиллахыг эрмэлзэнэ. Эдийн засаг, нийгмийн асуудал хүнд үед нийтлэг эрх ашиг зарчимд тулгуурлан чадалтай хүмүүсээ сайдаар томилж ажиллах бодлого барина. 

-Шинэ Засгийн газар хэр тогтвортой байх вэ? Удахгүй МАН-ын Их хурал болж, даргаа сонгоно. Намын дарга Ерөнхий сайд байх уу?

-МАН-ын даргын асуудлыг их хурлаар хэлэлцэнэ. Одоогоор яригдаагүй байна. Засгийн газрыг тогтвортой ажиллуулахын төлөө МАН-ын Удирдах зөвлөл анхаарна. Гэхдээ энэ нь хариуцлага алдсан тохиолдолд тооцоо хийхгүй гэсэн үг биш.  Алдаа гаргавал хариуцлага тооцно.

Н.Энх