Цаг улирлаа дагаад хүмүүсийн идэвх сэргэж, шинэ хэмнэлд бүрэн орж байгаа нь ажиглагдана. Улс төрийн амьдрал ч өрнөлдөө ирээд байна. Ужиг толхилцоо талцаан нэг талдаа гарч төрийн ажил жигдэрснийг Чуулганы индрээс Их хурлын даргын илтгэлээр бид өнөөдөр сонсох болов уу.

Олон нийтийн зүгээс дүгнэж буйгаар У.Хүрэлсүх сайдын шинэ цаг үеийн тоолол өнөөдрөөс жирэлзтэл гүйж эхэлнэ. Хувь хүнийх нь талаас улс төрийн тэмцэлд ялалт байгуулж байгаа бол улс орных нь талаас сөхөрсөн эдийн засаг, цөхөрсөн ард түмэн хараалж сууна.

Олон хууль батлагдаад, цалин тэтгэвэр нэмэгдээд амьдрал нь сайжирч нөхцөл боломж нь дээшилнэ гэдэгт одоо найдах хүн байхгүй. Төсөв мөнгийг нь хэдэн тэрбумаар өсгөлөө ч  утаа шингэрэхгүй байгаатай адил. Бид аймшигт авлига, хүнд суртлын балчигт байгаагаа олж харсан.

Суурь шинэчлэл. Шударга ёсны хэм хэмжээ, хууль дээдлэх зарчим улстөрчдөд үйлчилдэг ёс зүйтэй төр бий болохыг хүмүүс хүсч байгаа. Тэгээд ч цалин тэтгэвэр нэмэхгүй, бондын хүүг бонд босгож төлөх тал дээр байр сууриа илэрхийлсэн шинэ Ерөнхий сайдын мэдэгдэлд хүмүүс төдий л эмзэглэхгүй байна. Адис рашаан мэт цалин тэтгэврийн нэмэгдлээр хууртаж ард нь ямар их дампууралд улс орон нь тулж ирснийг иргэд ухаарчээ. Одоо улстөрчдийн ухаарах ээлж ирээд байгаа.

Найдвар гэдэг хийсвэр мэт боловч эерэг үйлдлийн сэдэл болж байдаг давуу талтай.  У.Хүрэлсүх Ерөнхий сайд болсноор маргаашнаас бүх юм гэнэт өөр болохгүй ч энэ төрийг атгасан цөөнх бүлэглэлийн тогтолцоо нурна гэсэн хүлээлт нь нийт олонхийн найдвар болсон. Энэ найдвар нь амьдралын идэвхийг нь бага атугай нэмж байгаа. Үүгээр урьдах 29 Ерөнхий сайдаас өөр шинэ агууламжтай хариуцлага, хүндхэн ачааг У.Хүрэлсүхэд үүрүүлж байгаа юм.  У.Хүрэлсүх томилгоогоо яаж хийж, эдийн засгийн талдаа танхимаараа ямар ч шийдвэр гаргаж болох ч дахин хуйвалдах наймаалцах, улс төрийн шахалт дарамтаар цөөнхийн эрх ашигт үйлчлэх эрхгүй. Аргагүй нөхрөө бодох, шалихгүй гэж шударга бусаар албан тушаалын зусар томилгоо хийх эрхгүй.

Алхам бүрийг нь өөнтөглөн харж, бүдрэх бүр дээр нь нэмэх өрсөлдөгчийнх нь тоо нэмэгдсэн ч шударга ёсны төлөөх эрсдэл бүрийг нь хуваалцан дэмжих ард түмэн яг одоо бол У.Хүрэлсүхийн талд байна. Ямар ч яаруу улстөрч, хэчнээн их мөнгө хаяад ч олон нийтийн ийм том дэмжлэгийг санаан зоргоор босгохгүй. Энэ бол улстөрч хүний хувьд нэг талын том аз, нөгөө талын ирмэг хадан дээр зогсож байгаа мэт маш том эрсдэл. Анхны алхмаараа буруу тал руугаа ганц хазгай гишгэхэд нисэж болох ангалын ирмэг дээр зогсохтой адил.  Цаг үеийн тун эгзэгтэй үед улс төрийн маш том задралыг хүлээн авч  мэс заслын ширээнд дээрх гол эмчээр У.Хүрэлсүх гарч ирж байна. 

Бидний шилжилт шинэчлэл гэж янз бүрээр яриад байгаа МАНАН задрах үйл явц хүссэн ч эс хүссэн ч болох байсан. Учир нь энэ зайлшгүй эргэлт гарах суурь бэлтгэлийг манай улстөрчид 20 жилийн хууран мэхлэлтээр суурийг нь тавьсан ба цөөнх гэр бүлээрээ баяжиж ирсэн. Сүүлийн хүч нэмсэн зүйл нь үнэмлэхүй ялсан МАН-ын засгийн будилсан алхмууд болж бардам ялалтдаа эрдэж "төгс" хийсэн албан тушаалын аархал улам түргэтгэж өгсөн юм.

Намрын чуулган нээлтээ хийснээр улс төрийн амьдрал цэгцэрнэ гэж олон нийт найдаж байгаа. МАН-ын дотоод зөрчил ил болсон болохоор одоо нурших  ба улам өдөөх нь илүүц биз. Улс төр хийж буй дүрмээрээ нэг тал нь ялж нөгөө тал нь ялагдаж буй. Гэхдээ хөгжсөн улс оронд хэн нь ялж  ялагдсан ард нь улс орон нь хохирохгүй, хожиж байдаг тэр жишиг манайд тогтох болсон. Энэ чуулганы нээлтээс цаана  МАН-ын Их хурлаар өртөөлөх үйл явц, тэдний дотоод эв нэгдлээс У.Хүрэлсүхийн биш бидний монголчуудын хувь заяа ихээр хамаарч буй.

Пүрэвжавын Баярхүү / тоймч /