Эмч нар цалингаа хоёр дахин нэмэгдүүлэхийг шаардан өнөөдөр жагсаал зохион байгууллаа. Жагсаалд оролцогчид “Нэг эмч 2-3 эмчийн ажлыг зэрэг хийдэг ч сард 400-600 мянган төгрөгийн цалин авдаг. Түүнийгээ зээлэндээ өгөөд халаас хоосон гэртээ очдог” гэдгээ учирлаад цалингаа хоёр дахин нэмэгдүүлэхийг Засгийн газраас шаардаж хэрэв шаардлагагыг биелүүлэхгүй бол энэ сарын 23-наас хугацаагүй ажил хаялт зарлана гэдгээ мэдэгдсэн юм. Жагсаалд 21 аймаг, нийслэийн 56 эрүүл мэндийн байгууллагын 20 орчим мянган ажилчид оролцож байгаа аж. Энэ үеэр жагсаалд оролцогчдоос зарим зүйлийг тодрууллаа.
Б.Мягмар: Нэгэн зэрэг 2-3 эмчийн ажил хийдэг бид цөхөрч, ядарч байна
Монголын Эрүүл мэндийн ажилтны холбооны дарга Б.Мягмар
-Засгийн газар багш, эмч нарын цалинг нэмэх боломжгүй гэж үзэж байгаа. Та бүхэн цалин нэмэх ямар боломж бий гэж үзэж байна вэ?
-Монгол хүний амийг хамгаалах, хөдөлмөрчдийнхөө цалинг нэмэгдүүлэхийн төлөө бид жагсаж, тэмцэж байгаа юм. Монгол Улсын УИХ-ын гишүүд, Засгийн газрын гишүүд төрийн эрхэнд гарахдаа бидний цалинг нэмнэ гэж амалсан. Энэ амлалтаа биелүүлэхийг шаардаж байна. Эрүүл мэндийн салбарын ажилтнууд чанартай тусламж үйлчилгээний төлөө тэмцэж байна. Бидний цалинг нэмэх боломжгүй биш. Харин ч боломжтой. Төрийн албан хаагчийн хоёр орон тооны нэгэд нь л хүн авч байгаа. Үүний дүнд 2016 онд 1.9 тэрбум, 2017 онд 7.4 тэрбум, 2017 онд 20 гаруй тэрбум төгрөг хэмнэсэн байдаг. Энэ мөнгөө юунд зарцуулсныг Засгийн газраас асуумаар байна. Бидний цалниг нэмж, 2018 оны төсвөө дахин батлахыг шаардаж байна.
-Засгийн газар шаардлагийг биелүүлэхгүй бол ямар арга хэмжээ авах вэ?
-Хуулиар олгогдсон эрхийн дагуу хамтын маргаан үүсгэсэн байгаа. Үүний дагуу эмч нарын ажил хаях эрх аравдугаар сарын 23-нд үүснэ. Ажил хаялтад хэрхэн, ямар хэлбэрээр оролцохоо байгууллага дотроо хуралдаж байгаад шийдвэрлэнэ. Түүнээс өмнө Засгийн газар хэлэлцээрийн ширээний ард сууж, шийдвэр гаргахгүй бол бид хугацаагүй ажил хаялт зарлана. Нэг эмч 2-3 эмчийн ажлыг давхар хийж байна. УИХ-ын гишүүд амалсандаа хүрэх хэрэгтэй.
-Эмч нар ард иргэдийн эрүүл мэндийг хамгаалахаар тангараг өргөдөг. Та бүхнийг жагсаал зохион байгуулж, ажил хаях хугацаад иргэдийн эрүүл мэнд хэрхэх вэ?
-Өнгөрсөн нэгдүгээр сараас цалин нэмэх асуудлыг Засгийн газарт хүргүүлсэн байдаг. Ер нь бид жил бүр цалин нэмэгдүүлэх цуглаан зохион байгуулдаг. Гэвч өнөөдрийг хүртэл ямар ч ахиц, дэвшил гарсангүй. Монгол хүний алтан амийг хамгаалахын төлөө бид ажилладаг. Бусдын цус, ялгадас, идээ бээртэй ажиллахдаа бид түүнийгээ үүрэг гэж ойлгоод л ажилладаг. Гэвч бидний ачаалал 2-3 дахин их. Бид цөхөрч, ядарч байна. Өргөсөн тангаргаа зөрчихгүй гээд энд ээлжнээсээ буусан эмч, ажилчид ирсэн байна.
С.Тунгалаг: Эмч нарын 90 гурай хувь нь цалингийн, 30 гаруй хувь нь давхар зээлтэй
Сүхбаатар аймгийн Нэгдсэн эмнэлгийн Үйлдвэрчний хорооны дарга С.Тунгалаг
-Танай аймгийг төлөөлж хэдэн хүн жагсаалд оролцож байна вэ?
-Эрүүл мэндийн салбарын ажилчдын цалинг 50-иас доошгүй хувиар нэмэгдүүлэх тайван жагсаалд Сүхбаатар аймгийг төлөөлж Нэгдсэн эмнэлгийн 20 гаруй ажилтан ирсэн. Бидний авч буй цалин амьдралд огт хүрэлцэхгүй байна. Эмнэлгийн салбарын 90 гурай хувь нь цалингийн зээлтэй, 30 гаруй хувь нь давхар зээлтэй. Тиймээс бид цалингаа нэмэгдүүлэхийг тууштай тэмцэнэ.
-20 гаруй эмч нар өвчтөнөө орхиод ирсэн гэсэн үг үү?
-Сүхбаатар аймгийн эмнэлгийн байгууллагын эмч, ажилчдын эрх, ашгийг төлөөлж 20 гаруй эмч нар жагсаалд оролцож байгаа ч бид ажлаа орхиогүй. Дотооддоо зохион байгуулсан. Өөрөөр, хэлбэл бид өчигдөр ээлжинд гараад буунгуутаа жагсаалд оролцож байна.
У.Уранчимэг: Цалингаа нэмүүлэхээр 800 км замыг туулан ирлээ
Хөвсгөл аймгийн Нэгдсэн эмнэлгийн Үйлдвэрчний хорооны дарга У.Уранчимэг
-Танай аймгаас хэчнээн эмч ирсэн бэ. Хэзээ буцах вэ?
-Бид хүний амь настай яригдах чухал ажилтай тул шууд ажлаа орхиж болохгүй. Тиймээс ээлжнээсээ буусан эмч нар цуглаанд оролцохоор 800 км замыг туулан ирлээ. Өнөө оройноос буцна. Гэхдээ Засгийн газар бидний тавьсан шаардлагыг биелүүлэх бол бид энэ сарын 23-наас эхлэн хугацаагүй ажил хаяна. Одоогоор бид аймагтаа Цалин нэмэгдүүлэх түр хороо байгуулсан. Биний цалин амьдралд хүрэлцдэггүй.
-Орон нутагт эмч нарын хүрэлцээ хэр байдаг вэ. Тэнд ажиллаж байгаа эмч нарын цалин бусдаас арай илүү байдаг уу?
-Улаанбаатарт ч, орон нутагт ч эмч нарын ажлын ачаалал их байдаг. Цалин ч ялгаагүй байдаг 400-600 мянган төгрөг байдаг. Мөн орон нутагт ажлын байрны орчин хүнд. Мөн эмч нарын эрүүл мэнд муудаж, өвчлөл нэмэгдэж байгаа.
Р.Ренчиндулам