Тусгай боловсролын 29 дүгээр сургуулийн захирлаар Б.Батсайханыг өчигдөр дахин томилсон. Түүнийг өнгөрсөн дөрөвдүгээр сарын 26-нд нийслэлийн Засаг дарга С.Батболдын захирамжаар ажлаас нь чөлөөлөөд байсан юм. Ингэхдээ түүнийг ажлын хариуцлага алдсан хэмээн ажлаас нь чөлөөлсөн бөгөөд сургуулийн багш, ажилчид нь сурагчдад бэлгийн дарамт үзүүлдэг байсан эсэхийг Сүхбаатар дүүргийн Цагдаагийн нэгдүгээр хэлтсээс шалгаж байсан билээ. Тэрбээр ажлаас чөлөөлөгдсөн талаараа шүүхэд гомдол гаргаж, хоёр шатны шүүхэд ялалт байгуулснаар ийн ажилдаа эргэн томилогджээ.Энэ талаар нийслэлийн Боловсролын газрын дарга Ж.Гантулгаас тодрууллаа.
-Б.Батсайханыг ажилд нь дахин томилсонд хүмүүс шүүмжлэлтэй хандаж байна. Үүнд ямар тайлбар өгөх вэ?
-Өнгөрсөн дөрөвдүгээр сарын 26-нд нийслэлийн Засаг даргын захирамжаар түүнийг хөдөлмөрийн гэрээгээ хангалтгүй биелүүлсэн, сургуулийн дотоод дүрмийг зөрчсөн гэх үндэслэлээр Б.Батсайханыг ажлаас нь чөлөөлж байсан. Өчигдөр буюу аравдугаар сарын 5-нд БСШУС-ын сайдын үүрэг гүйцэтгэгчийн тушаалаар 29 дүгээр сургуулийн захирал Б.Батсайханыг ажилд нь буцаан томилсон. Үүнээс өмнө буюу тавдугаар сарын 11-нд БСШУС-ын сайдын тушаалаар нийслэлд үйл ажиллагаа явуулж буй тусгай сургууль, цэцэрлэгийг төрийн захиргааны мэдэлд авсан байдаг. Тиймээс эдгээр байгууллагууд яамны мэдэлд орж, түүний захирал эрхлэгчийг томилох чөлөөлөх, хөдөлмөрийн аюулгүй байдалтай холбоотой асуудлыг яам шийдвэрлэдэг болсон. Энэ эрх хэмжээнийхээ хүрээнд БСШУС-ын сайдын үүрэг гүйцэтгэгч өчигдөр ийм шийдвэр гаргасан.
-Хоёр шатны шүүхэд ялалт байгуулсан болохоор ажилд нь дахин томилсон юм биш үү?
-Энэ талаарх мэдээллийг манайх өгөх нь зохимжгүй. Шүүхийн байгууллагаас энэ бүхнийг асуусан нь дээр байх. Ерөнхийдөө, сайдын тавдугаар сарын 11-нд гаргасан тушаалын дагуу сайдын үүрэг гүйцэтгэгч эрх хэмжээнийхээ хүрээнд өчигдөр ийм шийдвэр гаргасан.
Р.Дулам
Уншиж байна |