УИХ-ын чуулганы хуралдаанаар Засгийн газрын гишүүдийн томилгоог хэлэлцэн баталлаа. Монгол Улсын Ерөнхий сайд  У.Хүрэлсүхийн танхим:

• Шадар сайд Ө.Энхтүвшин
• ЗГХЭГ-ын дарга Г.Занданшатар
• БОАЖ-ын сайд Н.Цэрэнбат
• БХ-ын сайд Н.Энхболд
• ГХ-ны сайд Д.Цогтбаатар
• Сангийн сайд Ч.Хүрэлбаатар
• ХЗДХ-ийн сайд Ц.Нямдорж
• ХНХ-ын сайд
• БХБ-ын сайд Х.Баделхан
• БСШУ-ы сайд Ц.Цогзолмаа
• ЗТХ-ийн сайд Ж.Бат-Эрдэнэ
• УУХҮ-ийн сайд Д.Сумъяабазар
• ХХААХҮ-ийн сайд Б.Батзориг
• ЭХ-ний сайд Ц.Даваасүрэн
• ЭМ-ийн сайд Д.Сарангэрэл гэсэн 15 гишүүний бүрэлдэхүүнтэй ажиллана. Ийнхүү  У.Хүрэлсүхийн Засгийн газар бүрэн бүрэлдэхүүнээрээ ажиллаж эхэлж байна.

Ерөнхий сайд Засгийн газрын танхимаа  100 хувь парламентаас буюу “давхар дээл”-тэй гишүүдээс бүрдүүллээ. Энэ нь сөрөг хүчний зүгээс шүүмжлэл дагуулсан хэдий ч Засгийн газрын бодлого үйл ажиллагааг хэрэгжүүлэхэд парламентаас дэмжлэг авах чухал ач холбогдолтой гэж Ерөнхий сайд тайлбарлаж байгаа. Нөгөө талаас салбартаа туршлагатай, ажил хийх, чадалтай эрхмүүдээр Засгийн танхимаа бүрдүүлж байгаагаа онцолсон юм.

Ингээд Засгийн газрын гишүүдийн томилгоог хэлэлцэхэд шинэ сайд нар салбартаа ямар ажлыг, хэрхэн хэрэгжүүлэх талаар  хэн нь юу хэлснийг хүргэе.

Шадар сайд Ө.Энхтүвшин:

-Бид үзэл бодол, зарчим, үнэт зүйл, олон түмний өмнө хүлээж байгаа хариуцлага дээрээ ойлголцсон. Шадар сайдын эрхлэх асуудлын хүрээнд өмч хувьчлалын асуудлыг шууд хариуцахаар тусгаагүй. УИХ-аас өмч хувьчлалын бодлогыг гаргадаг. Энэ дагуу ажиллана.

БОАЖ-ын сайд Н.Цэрэнбат:

- Монгол Улсыг уул уурхайн лицензээр хувааснаас болж асуудал үүссэн. Бид хариуцлагатай уул уурхайг хөгжүүлэх ёстой. Энд, тэнд очоод нутаг ус сэндийчээд байдаг хүмүүстэй хариуцлага тооцно. Ямар компани, ямар хувь эзэмшилтэй компани нь хууль дүрэм зөрчөөд, ямар нь хуулиа барьж байгаа дээр ажиллана. Байгалиа хамгаалах асуудалд онцгой анхаарч ажиллана.

БХ-ын сайд Н.Энхболд:

-Цэргийн албыг 2 жил болгоход болохгүй зүйлгүй. Бидэнд ийм шаардлага бий. Санаачлаад ярихад болохгүй юм байхгүй. Өнөөдөр батлах хамгаалах яамны хэмжээнд болж байгаа үйл ажиллагааны 70-аад хувь нь гадаад хамтын ажиллагаатай холбоотой байдаг. Энхийг сахиулах хүчинд манай дайчид оролцож байгаа. Энэ бол цэргийн мэдлэг туршлага хуримтлуулахад маш дэмтэй арга хэмжээ юм. Үр дүн өгч байгаа учраас зөв зохистой хөгжүүлэх тал дээр анхаарч ажиллана.

ГХ-ны сайд Д.Цогтбаатар:

-Бид Гадаад байгаа иргэддээ туслах сан байгуулан ажиллаж байгаа. Гадаад харилцааг эдийн засагжуулах тал дээр утааг бууруулах тал дээр НҮБ-тай хамтарч ажиллахаар судалгаа хийж байна. Мөн Монголын бараа, бүтээгдэхүүнийг экспортод гаргах талаар ярилцаж байна. Гадаад дахь ЭСЯ-ыг ажиллуулахад өчнөөн санхүү гардаг. Үүнийг зөвхөн улс төрийн харилцаанаас харвал учир дутагдалтай. Дипломат арга хэрэгслээр туслалцаа дэмжлэг авдаг. Гадаадад байгаа ЭСЯ-д шинэ технологи, харилцаа яаж гарч ирж байгааг хамгийн түрүүнд өөрсдөө олоод мэдэх боломжтой.

Сангийн сайд Ч.Хүрэлбаатар:

-ОУВС-тай энэ асуудлаар дахин хэлэлцээр хийнэ.  Өнөөдөр Монгол Улсын төсөв 2.7 их наяд төгрөгийн алдагдалтай байна. Өөрсдөө давсан тоо тавьчихаад эдийн засаг өслөө гэж байна. Ингэж болохгүй.  Төр өндөр хүүтэй зээлийг дотоодын арилжааны банкуудаасаа авахыг тэглэнэ. Ингэвэл дотоодын арилжааны банкууд хувийн хэвшилд зээл олгоно. 2018 онд дотоодоосоо өндөр хүүтэй зээл авахгүй. Ингэж чадвал бид өрийг бууруулах боломжтой. Ингэж чадвал Монгол Улсын төсөв эрүүлжинэ.

ХЗДХ-ийн сайд Ц.Нямдорж:

-Монгол Үндсэн хуулийн систем бүхэлдээ нурж унаж байгаад гайхаад байна. Би С.Зоригийн амийг хөнөөсөн хэргийн захиалагчийг шаардана. Хоёрдугаарт, шинэ хуулийн хэрэгжилтийг судалж үзнэ. Монголын хууль орчиндоо таарсан байх учиртай. Залруулах арга хэмжээ оруулж ирнэ. Монголд таараагүй хууль батлахаар өөрөө систем нь нурж унаад байдаг юм.  Хууль дээр ажиллаж байх үед согог нь мэдэгддэгүй юм. Хэрэгжээд эхлэхээрээ мэддэг юм.

БХБ-ын сайд Х.Баделхан:

-Барилгын салбарт хүнд суртал байна гэдгийг  мэдэж байна. Ялангуяа зөвшөөрөл өгдөг шатандаа байгаа хүнд сурталд анхаарал тавьж ажиллана. Гэр хорооллын дахин төлөвлөлт дээр төсөл хэрэгжиж байгаа юм билээ.  Хотын төвийн хэсгийн гэр хорооллыг барилгажуулна.  Гэр хорололд халуун, хүйтэн ус, дулаан дэд бүтцийг шийдэж өгөх нь төрийн үүрэг. Үүнийг дэмжиж ажиллана.

ЭМ-ийн сайд Д.Сарангэрэл:

-Нийгмийн эрүүл мэндийн боловсролд анхаарснаар иргэдийн эрүүл мэндийг хамгаалах нөхцөл бүрдэнэ. Хавдар, тэр дундаа элэгний хорт хавдрыг бид ярьдаг. Засгийн газар “Элэг бүтэн Монгол” хөтөлбөрийг хэрэгжүүлж байгаа. Энэ чиглэлээр А.Цогцэцэг сайд  нэлээд ажлыг хэрэгжүүлсэн. Үүнийг үргэлжлүүлнэ. Эм, эмнэлгийн зохистой хэрэглээний хуулийг батлуулснаар зохион байгуулах, хяналт тавих агентлаг байгуулах шаардлага бий.

Эмийн талаар төрөөс баримтлах бодлогод дотооддоо нийт эмийн 50 хувийг үйлдвэрлэх талаар туссан. Энэ бодлогыг хэрэгжүүлэхийг зорино. Эмч, эмнэлгийн ажилчдын цалин хөлсийг нэмэгдүүлэхэд хамгийн түрүүн анхаарлаа хандуулна.

ЭХ-ний сайд Ц.Даваасүрэн:

Би мэргэжлийн багтай гар нийлж ажиллана, үүнийг ойлгоорой. ТЭЦ-уудын чиглэлээр тодорхой ажил хийнэ. Өмнөх төлөвлөсөн ажлуудыг үргэлжлүүлнэ. 10 аймагт Дулааны станц барина. Энэ нь утааг бууруулна. Сэргээгдэх эрчим хүчний хувьд тарифын асуудал бий. Зохистой харьцааг хангах хэрэгтэй.

ЗТХ-ийн сайд Ж.Бат-Эрдэнэ:

-Төрийн бодлого, тэр дундаа сайдын бодлого залгамж холбоотой байдаг. Бидэнд маш олон бодлого байгаа. Хамгийн сүүлд 2030 он хүртэлх тогтвортой хөгжлийн бодлого байгаа. Сайд гэдэг нь хамгийн түрүүн хэрэгжүүлэх шаардлагатай бодлогоо гаргах хэрэгтэй гэж боддог. Чин сэтгэлээсээ ажил хийх бодолтой байх ёстой. Нэн тэргүүнд Тавантолгой-Гашуунс ухайтын төмөр замыг дуусгах асуудал тавигдана. Агаарын тээврийн тухайд билетний асуудал хамгийн түрүүн яригддаг.  Эдийн засгийн хөшүүрэг болох ложистик тээврийг хөгжүүлэхэд анхаарна.

Н.Энх