Ерөнхийлөгч Х.Баттулга Сангийн сайдаар УИХ-ын гишүүн Ч.Хүрэлбаатарыг томилсон УИХ-ын тогтоолд хориг тавьсан. Ерөнхийлөгчийн хоригийг МАН-ын бүлэг болоод байнгын хороод хүлээн аваагүй. Энэ долоо хоногт УИХ-ын чуулганы нэгдсэн хуралдаанаар хэлэлцэн, эцсийн шийдвэрийг гаргах юм.
Сангийн сайдад тавьсан Ерөнхийлөгчийн энэ хоригийн ард Тамгын газрын дарга З.Энхболд нь байгаа хэмээн Ч.Хүрэлбаатар мэдэгдээд буй. Тэрбээр З.Энхболд өс санаж, ийм үйлдэл хийсэн хэмээн үзэж байгаа юм. Мөн тэрбээр уул уурхайн лиценз эзэмшдэггүй гэдгээ хэвлэлээр дамжуулан мэдэгдсэн.
Тэгвэл Монголын баялгийг эзэмшигч 30 гэр бүлийн нэгээр нэрлэгдээд буй Сангийн сайд Ч.Хүрэлбаатарын талаар Ерөнхийлөгчийн Тамгын газрын дарга З.Энхболдп баримт дэлгэж эхэллээ. Тэрбээр дөнгөж сая цахим хуудсандаа "Сангийн сайд Чимидийн Хүрэлбаатарын төрсөн ах нар болох Чимидийн Гантулга, Чимидийн Гансүх, мөн зөвлөх К.Дэмбэрэл нар Увс аймгийн Бөхмөрөн сумын Хотгор шанагын уурхайг Солонгосын компанид 2 сая доллараар заржээ" хэмээн гэрээний хуулбарыг байршуулжээ. Мөн энэ тухайгаа "Монгол улсын үндсэн хуулийн 6.1-д заасан ард түмний мэдэлд байх нийтийн өмчийг лиценз нэрээр авсан сангийн сайдын хамаатнууд зарж л байг уу? Төрийн өмчийн нэг муу амбаарыг хүртэл дуудлагын худалдаагаар зарж мөнгийг нь улсын төсөвт оруулдаг биз дээ. Ийм хүмүүсийг ядаж битгий сайд болооч гэж Ерөнхийлөгч хориг тавьсан, энэ 7 хоногт УИХ-аар хэлэлцэнэ. МАН-ын бүлгийн 65-аас хэд нь өөрсдийн бүтээгээгүй ард түмний өмч байгалийн баялгийг үнэгүй хувьчилж авсан 30-н гэр бүлийн талд кнопдохийг харах л үлдлээ" хэмээн бичсэн байна.
Б.Энэрэл