УИХ-ын чуулганы үдээс хойшхи нэгдсэн хуралдаан товлосон хугацаанаасаа цаг орчмын дараа эхэллээ.

Үдээс өмнөх хуралдаанаар гишүүн Я.Содбаатар "2018 оны улсын төсвийн төслийг хэлэлцэхийн өмнө Ерөнхийлөгчийн хоригийг хэлэлцэх ёстой. Ерөнхийлөгчийн хоригоор Сангийн сайд Ч.Хүрэлбаатарын асуудал яригдана" хэмээн завсарлага авч байсан юм. Засгийн газрын зарим сайдын томилгоонд Ерөнхийлөгч хориг тавьсанаар Сангийн сайд Ч.Хүрэлбаатарын албан тушаал түдгэлзээд байгаа билээ. Тиймээс хуулиараа ирэх оны улсын төсвийг хэлэлцэхэд Ч.Хүрэлбаатар сайд хариулт өгөх боломжгүй юм. 

Харин үдээс хойшхи хуралдаан эхэлж байгааг УИХ-ын дарга мэдэгдээд 2018 оны улсын төсвийн төслийн нэг дэх хэлэлцүүлгийг хийх талаар танилцуулав. . Хэлэлцэх асуудлыг танилцуулах үед УИХ дахь МАН-ын бүлгийн дарга Д.Хаянхярваа "2018 оны улсын төсвийг төслөөр манай бүлэг хуралдаж, хэд хэдэн асуудалд байр сууриа нэгтгэж, санал гаргаж байгаа. Тиймээс тав хоногийн завсарлага авах санал гаргаж байна" гэлээ. 

Ийнхүү МАН-ын бүлэгт тав хоногийн завсарлага өгснөөр өнөөдрийн хуралдааныг өндөрлүүлэв. 

Хэдийгээр МАН-ын бүлгийн хуралдаанаар  Ерөнхийлөгчийн хоригийг хүлээж авахгүй гэсэн байр суурь хүрсэн гэж мэдээлсэн ч дотроо зөрчилтэй байгаа бололтой. Өнөөдөр үдээс өмнөх хуралдааны дараагаар  УИХ дахь МАН-ын бүлэг 33:32-оор талцан, экс Ерөнхий сайд Ж.Эрдэнэбат, МАН-ын бүлгийн дарга Д.Хаянхаярваа нарын өрөөнд хоёр хуваагдан цуглаж, хуралдсан  сурагтай. 

Н.Энх