Засгийн газрын хуралдаанаар ТЕГ-ын дарга Б.Хурцыг албан тушаалаас нь чөлөөлж, Монгол Улсаас БНСУ-д суух Онц бөгөөд Бүрэн эрхэт Элчин сайдаар томилохоор шийдвэрлэсэн. Үүнтэй холбогдуулан УИХ-ын гишүүн Ж.Батзандан сэтгүүлчдэд мэдээлэл хийлээ. Тэрбээр:
-Би өнгөрсөн парламентад Өргөдлийн байнгын хорооны гишүүнээр ажиллаж байсан. Өргөдлийн байнгын хороонд Б.Хурцтай холбоотой маш их өргөдөл, гомдол ирдэг байсан. Д.Энхбат гэдэг залууг Зориг агсны амийг хөнөөсөн хэрэгт холбогдуулан Франц, Германаас унтуулдаг тариа хийж авчирсан хүн бол Б.Хурц. Үүний Монгол даяар, дэлхий даяар мэдэж байгаа. Тэр залуу хилс хэрэгт холбогдсон нь тогтоогдон гараад 6 сарын дараа амиа алдсан. Гэр бүлийнхэн нь гомдол ирүүлсэн. Олон улсын байгууллага, Европын холбоо одоо ч энэ хэргийг шалгаж байгаа. Энэ хэргийг шалгах ёстой гэж би боддог. Монгол Улсын жирийн иргэнийг тагнуулын байгууллагын гишүүн нь авчирдгийг болиулах хэрэгтэй.
Саяхан С.Зориг агсны амь насыг хөнөөсөн хэргийг шийдээд гурван залууг ялласан. Одоо болтол захиалагч нь олдохгүй байгаа. Би энэ асуудлаар ХЗДХ-ийн сайд Ц.Нямдоржтой ярьж, УИХ-аар нээлттэй хэлэлцье гэсэн. ТЕГ-ын дарга энэ хэргийг илрүүлснийхээ төлөө генерал цол авсан байдаг. Энэ асуудал ил тод хэлэлцэхээс нааш Б.Хурц гэдэг хүний дараагийн томилгоог хийж болохгүй. Б.Хурц гэдэг хүнд бизнесээ дээрэмдүүлсэн хүмүүс өргөдлөө өгч, УИХ-аар нээлттэй хэлэлцүүлэх хэрэгтэй. Миний бие Б.Хурцтай холбоотой томилгооны сонсгол хийх санал гаргаж байна хэмээлээ. Тэрбээр мэдээлэл хийснийхээ дараа сэтгүүлчдийн асуултад хариулав.
-Нээлттэй сонсгол явуулах санал гаргахад хэдэн гишүүн гарын үсэг зурснаар хэрэгжих вэ?
-19 гишүүн гарын үсэг зурснаар санал гаргах эрх нээгдэнэ. Би 19 гишүүний гарын үсэг бүрдэх байх гэ бодож байна. Хэрвээ гишүүдийн гарын үсэг бүрдэхгүй бол УИХ Б.Хурцын томилгоог дэмжиж байна гэсэн үг. Алийн болгон мафийн шинжтэй бүлэглэлийн толгойлогчоос айж амьдрах юм.
Н.Энх