Төрийн албан хаагчдад нэг удаагийн тэтгэмж олгохоор 2017 оны төсвийн тодотголд 55 тэрбум төгрөг тусгаж, УИХ баталсан. Гэвч Ерөнхийлөгч 55 тэрбум төгрөгийг салхинд хийсгэх нь хэмээн хориг тавьж, УИХ-аар хэлэлцүүлэв.
Энэ үеэр Ерөнхийлөгч “Ч.Хүрэлбаатар бид хоёр нэг засагт хамт байсан. Янз бүрийн зовлон ярьдаг байсан. Өнөөдөр 55 тэрбум төгрөг их мөнгө үү, та хариулаач” гэж Сангийн сайдад хандав.
Сангийн сайд Ч.Хүрэлбаатар хариуд нь “Ерөнхийлөгч өө, Гашуунсухайтын төмөр замын зээлийн жилийн хүү 55 тэрбум шүү” гэсэн товч бөгөөд тодорхой хариултыг өгөв. Мөн тэрбээр “Гашуунсухайт руу явсан төмөр зам холболтын цэгээсээ 20 км зөрсөн. Өндөржилтөөр зургаан давхар байшинтай тэмцэх хэмжээг алдчихсан. Үүнийг авахад Хөгжлийн банкнаас 220 сая доллар гарсан байгаа. Жилийн 7.3 хувийн хүүтэй. Зөвхөн хүүнд нь бид жилд 55 тэрбум төгрөг төлж байгаа. Овоолоод босгосон даланд төлж байгаа мөнгөний хүү” гэсэн хариултыг Ерөнхийлөгчид өглөө.
Б.Энэрэл