Зарим ерөнхий боловсролын сургууль, цэцэрлэг, шинжлэх ухааны байгууллагууд өнөөдрөөс эхлэн хугацаагүй ажил хаялаа. Багш, судлаачид цалингаа нэмүүлэхийг шаардаж буй. Энэ ондоо багтаан цалинг 50 хувиар нэмэх шаардлагыг тавин, ийн ажил хаялаа.
Харин энэ ажил хаялтыг салбарын яам буруушааж, сургуулийн захирал, цэцэрлэгийн эрхлэгч нарт албан тоот явуулжээ. БСШУС-ын сайд Ц.Цогзолмаагийн гарын үсэгтэй энэхүү албан тоотод цалингийн асуудлыг хүчээр, бусдыг хохироосон, өдөөн турхирсан байдлаар шийдэхгүйг дурджээ. Мөн хууль бус ажил хаялтын сөрөг үр дагаврыг зохион байгуулагчид хариуцана гэдгийг хатуу анхааруулав. Тиймээс сургууль, цэцэрлэгийг үйл ажиллагаагаа хэвийн явуулахыг хүссэн байна.
Гэвч багш нар салбарын сайдын үгийг тоосонгүй, өнөөдрөөс ажил хаялаа. Яриа хэлэлцээр үр дүнд хүрээгүй хэмээн ажил хаясан багш нар сайдын соёлтой тулган шаардалтыг ч үл тоолоо. Тэгэхээр салбарын яамны дараагийн алхам юу байх бол.
Б.Энэрэл