ЕТГ-ын дарга З.Энхболд сэтгүүлчдэд мэдээлэл хийлээ. Тэрбээр мэдээлэлдээ:
-Их эзэн Чингис хааны мэндэлсэн өдөр, Монгол бахархлын өдрийг тохиолдуулан жил бүр улс орныхоо тусгаар тогтнол, бүрэн эрхт байдал, үндэсний эв нэгдлийг бататган бэхжүүлэх, төрт ёс, түүх соёлынхоо уламжлалыг гүнзгий судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулж, төр, нийгэм, үндэсний өмнө онцгой гавьяа байгуулсан нэг иргэнийг Монгол Улсын төрийн дээд шагнал тэргүүн зэргийн “Чингис хаан” одонгоор шагнадаг уламжлалтай.
Их эзэн Чингис хааны мэндэлсэн өвлийн тэргүүн сарын шинийн нэгэн энэ жил 11 дүгээр сарын 19-ний өдөр тохиож байгаа. Энэ өдөр Монгол Улсын төрийн дээд шагнал-тэргүүн зэргийн одон “Чингис хаан” одон гардуулах ёслолын ажиллагаа тогтсон дэг жаягийн дагуу болно.
Энэ өдөр Монгол Улсын Ерөнхийлөгчийн зарлигаар “Чингис хаан” одонг Монгол Улсын анхны олимпийн аварга, олимпын хос медальтан, Монгол Улсын хөдөлмөрийн баатар, Монгол Улсын гавьяат тамирчин, жүдоч Найдангийн Түвшинбаярт хүртээхээр боллоо хэмээн мэдээлэв. Н.Түвшинбаяр Монгол Улсын түүхэнд олимпийн анхны алтан медалийг хүртсэн нь 2008 оны долдугаар сарын нэгний өдөр УИХ-ын сонгуулийн үр дүнг үл зөвшөөрөн МАХН-ын Төв байрны орчим болсон иргэдийг үймээн, талцал, үл ойлголцол, таван хүний амь үрэгдсэн, олон хүн баривчлагдсан ээдрээт байдлыг эвлэрүүлэн зөөллөж, монголчуудын эв нэгдлийг хангаж, улс төрийн хурцадмал үйл явцыг намжаахад гол чухал үүрэг гүйцэтгэсэн гэдгийг мөн онцоллоо.
Н.Түвшинбаяр 1984 оны зургадугаар сарын нэгэнд Булган аймгийн Сайхан суманд төрсөн, айлын отгон хүүхэд. Тэрбээр:
- Монгол Улсын спортын түүхэнд 2008 оны Бээжингийн зуны олимпийн 29 дүгээр наадмаас анхны алтан медаль хүртсэн.
-2012 онд болсон Лондонгийн зуны олимпийн 30 дугаар наадмаас мөнгөн медаль хүртэж, олимпийн хос медальтан болсон.
-2010, 2011 онд Улсын аварга шалгаруулах тэмцээнээс Монгол Улсын аварга болсон.
-“Будапешт-2017” жүдо бөхийн насанд хүрэгчдийн ДАШТ-ний +100 кг жинд барилдаж, хүрэл медаль хүртсэн.
-2017 онд Улсын их баяр наадмын үндэсний бөхийн барилдаанд долоо давж Монгол Улсын заан цол хүртсэн.
Н.Түвшинбаяр нь Монгол Улсын төрийн дээд шагнал-тэргүүн зэргийн “Чингис хаан” хүртэж байгааа 11 дэх хүн болж байгаа юм.
Н.Энх
Уншиж байна |