ТЕГ-ын дарга асан Б.Хурц "Аятайхан байхгүй бол орон дотор чинь хүнээр хорлуулж алж чадна шүү" хэмээн өнөөдөр 14 цагийн үед УИХ дахь АН-ын бүлгийн дарга Д.Эрдэнэбатын өрөөнд УИХ-ын гишүүн Ж.Батзанданг сүрдүүлжээ.
Иймд Ж.Батзандан гишүүн УИХ-ын дарга М.Энхболд болон Аюулгүй байдал, гадаад бодлогын байнгын хорооны дарга О.Содбилэг, Хуульзүй, дотоод хэргийн сайд Ц.Нямдорж нарт хандан өөрийн болон гэр бүлийнхээ гишүүдийн эрүүл мэнд, амь насыг төрийн хамгаалалтад авахыг хүсчээ.
Б.Хурцыг Элчин сайдаар томилох асуудлаар томилгооны сонсгол явуулах саналыг Ж.Батзандан нарын нэр бүхий 21 гишүүн гарын үсэг зурж УИХ-д өргөн бариад байгаа юм. Харин өнөөдрийн чуулганы хуралдаанаар Б.Хурцыг Элчин сайдаар томилох асуудлыг хэлэлцэхээр байсан ч Тусгай хяналтын дэд хороогоор түүнд холбогдох асуудлыг хэлэлцэхээр болж хойшлуулсан билээ.
Н.Энх