Нийслэлийн Мэргэжлийн хяналтын газраас сошиал орчинд цагаан будааг шатааж чанарыг нь шалгаж байгаатай холбогдуулан өнөөдөр мэдээлэл хийлээ.
“Монгол Улсад 35 аж ахуйн нэгж найман улсаас цагаан будаа импортолдог. Эдгээр аж ахуйн нэгжийг цагаан будаагаа хилээр оруулж ирэх үед нь шинжилгээнд хамруулдаг. Ингээд шинжилгээнд хамруулсан будааг савладаг бөгөөд савлах орчин ямар байгаад манайх хяналт тавьж байгаа” гэв.
Мөн “Цагаан будаа нь үр тарианы гаралтай. Үр тариа нь цардуултай тул шатамхай чанартай. Цардуул нь хүнсний зориулалттай байхаас гадна түүгээр цавуу хийдэг. Мөн цардуул нь хуурай төлөвт байхдаа шатдаг. Та бүхэн цагаан будааны шатаж байгаа байдлыг харсан байх. Барьцалдаж байгаа. Үүнээс улбаалан болгоомжлоод байна. Хэрэв пластик будаа байсан бол агшаахад ч мөн барьцалдах ёстой” гэлээ. Ямар будаа хэрэглэвэл зохимжтойг лавлахад бүтээгдэхүүний хаяг шошгод сөрөг нөлөө зэргийг нь тусгасан байдаг тул хаяг шошгыг сайтар харж сонгохыг зөвлөв.
Түүнчлэн НМХГ “Аюулгүй хүнс” аяны хүрээнд энэ оны гуравдугаар сараас дөрөвдүгээр сард цагаан будаа савлаж, худалдаалж байгаа аж ахуйн нэгжүүдэд шалгалт хийжээ. Энэ үед Замын-Үүд боомтоор зөвшөөрөлгүйгээр цагаан будаа импортолсон тохиолдол илэрсэн байна. Эдгээр будааг шинжилгээнд хамруулж шаардлага хангаагүйг нь устгасан гэж байлаа.
М.Дөлгөөн