Боловсрол, соёл, шинжлэх ухааны байнгын хорооны хуралдаанаар Боловсролын тухай, Дээд боловсролын тухай, Дээд боловсролын санхүүжилт, суралцагчдын нийгмийн баталгааны тухай хуулийн хэрэгжилтийг хангах хүрээнд “Засгийн газарт чиглэл өгөх тухай” Байнгын хорооны 2017 оны 07 дугаар сарын 26-ны өдрийн 26 дугаар тогтоолын хэрэгжилтийн талаарх Боловсрол, соёл, шинжлэх ухаан, спортын сайдын мэдээлэл сонсож хэлэлцэв. 

Монгол Улсад 160 гаруй мянган оюутан суралцаж, их, дээд сургуульд нийт 7000 гаруй багш нар ажиллаж байгаа аж.  Магадлан итгэмжлэл дээр багш нар нь доктор, профессороор байна гэсний дагуу  хэдэн дээд сургуулиудын хооронд профессоруудын анкет дамжаад явж байдаг. “Сургалт нь чанаргүй олон дээд  сургууль байна гэсэн шүүмжлэл гардаг” гэдгийг БСШУС-ын сайд Ц.Цогзолмаа мэдээллээ.

Хэлэлцэж байгаа асуудалтай холбогдуулан гишүүн Н.Учрал “Одоо тоо ярьдаг болъё. Дээд боловсрол хаашаа яваад байна вэ гэдгийг тодорхойлох судалгаа хэрэгтэй гэлээ. 

“Ямар чадвартай үндэсний хэмжээний боловсон хүчин бэлтгэгдэж гарч байгаагаас шалтгаалж, тухайн салбарын үр хөврөл шалтгаална. Сайн санаачлагыг дэмждэг бодлого манай яаманд байх ёстой. Төр, хувийн хэвшлийн сургуулиа ялгаад харьцаж байгаа харьцаа харагдсан. Бид төрийн ч бай, хувийн ч бай  нэг хөтөлбөрөөр гаргадаг  явдаг байх хэрэгтэй. Бодлогоо зоригтой гарга гэдгийг миний хувьд хэлж байгаа. Яам бодлогын төвшинд дэмжих ёстой. Их, дээд сургуулиуд руугаа чиглүүлээд дэмжлэг авах нэг зүйл нь шинжлэх ухаан, технологийн санг уялдуулах хэрэгтэй.  Саяхны жишээ үүнийг нотолж байна. 400 гаруй сая төгрөгийг жагсаалтаар нэр зааж  оруулж ирээд батлаад өг гэж шахалт үзүүлж байх жишээтэй. Ахисан шатны сургалтад дэмжлэг үзүүлэх хэрэгтэй" хэмээн салбарын сайд хариулсан юм.

"Үнэлгээ хийгээд 6-7 сургуулийн үйл ажиллагааг хаахаар байгаа. Мэдлэгт суурилсан боловсон хүчнийг бэлтгэхэд дээд сургуулийн бодлого чиглэнэ. Шинжлэх ухааны технологийн үйл ажиллагааг дээд боловсролтой холбох дээр бид санал нэг байгаа" гэдгийг салбарын мэргэжилтэн тодотгов. 

УИХ-ын гишүүн Г.Мөнхцэцэг "Их, дээд сургууль төгсөөд ажлын байргүй байна. Ер нь дээд боловсролд үндэсний бодлого хэр тусч байна" гэдгийг тодруулав.  "Залуучууд руу чиглэсэн үндэсний үзэл санаа, тусгаар тогтнолын асуудлыг орхигдуулахгүй байх ёстой. Гэхдээ одоогоор шууд төлөвлөөд хэлэх зүйл алга байна. Бид 2018 оны нэгдүгээр сарын 26-28-нд дээд сургуулийн эрдэмтэн багш нарын улсын зөвлөгөөн хийнэ. Энэ зөвлөгөөнөөр бодлогоо тодорхойлно. " хэмээн БСШУС-ын сайд хариулав.

УИХ-ын гишүүн Д.Гантулга "Дээд боловсролын чанарыг яаж дээшлүүлэх вэ. Хөдөлмөрийн зах зээлийн тухай мэдээллийг яам зарлаж байх хэрэгтэй. Хүмүүс илүүдэлтэй мэргэжлээр сураад ажлын байр олдохгүй гээд явж байхад цаана нь мэргэжилтэн нь олдохгүй  салбар ч байна.   Ирээдүйд эрэлттэй болох мэргэжлийг зарлах хэрэгтэй хэмэээв.

Н.Энх