УИХ-ын чуулганы нэгдсэн хуралдаанаар Нэмэгдлийн хэмжээ тогтоох тухай УИХ-ын тогтоолын төслийн анхны хэлэлцүүлгийг хийж байна. Тогтоолын төсөлд сар бүр нэмэгдэл, мөнгөн тусламж авч байсан Монгол Улсын баатар, хөдөлмөрийн баатар, ахмад дайчин, алдар цолтон ахмад настанд сар бүр 200 мянган төгрөг, Монгол Улсын төрийн шагналт, төрийн соёрхолт, гавьяат цолтон, Улсын ударник, хувсгалт тэмцлийн ахмад зүтгэлтэн, Монгол Улсын Үндсэн хуулийг хэлэлцэж баталсан /1990-1992/ Ардын Их Хурлын депутат, Улсын Бага хурлын гишүүн ахмад настанд сар бүр 150 мянган төгрөгийн нэмэгдэл олгохоор тусгажээ.
Хэлэлцэж байгаа асуудалтай холбогдуулан гишүүн асуулт тавьж, хариулт авч байна. Гишүүн Б.Энх-Амгалан “Ахмад дайчин гэдэг ойлголт ямар хүрээг хамарч байна. Салбар салбартаа гавьяа байгуулсан хүмүүсийг хамруулах уу? гэлээ. Нийгмийн бодлого, боловсрол, соёл, шинжлэх ухааны байнгын хорооны дарга Ё.Баатарбилэг:
-Тэтгэврийн шинэчлэлийн асуудал манай байнгын хороон дээр яригдаж байгаа. Дэлхийн банкны хүмүүстэй уулзсан. Тэтгэврийн шинэчлэлээр нас нэмэгдүүлж байгааг эргэж харахаар болсон. Ахмад дайчин гэдэг нь 1939, 1945 оны дайнд оролцсон хүмүүсийг хэлж байна. Өмнөх Үндсэн хууль баталсан хүмүүсийн асуудал энэ хуулиар зохицуулагдаагүй гэв.
Уг УИХ-ын тогтоолыг анхны хэлэлцүүлгээр батлахыг байнгын хороо дэмжснийг гишүүд дэмжив. Ингээд Нэмэгдлийн хэмжээ тогтоох тухай УИХ-ын тогтоолын төслийг гишүүдийн олонхийн саналаар баталлаа.
Н.Энх
Уншиж байна |