Энэ онд 99 сургууль, 127 цэцэрлэгийн барилгыг барина
2018-01-22

 

“Тогтвортой хөгжил – Ерөнхий боловсрол” улсын хоёр дугаар зөвлөгөөн үргэлжилж байна. Улаанбаатар хотод болж буй хоёр дахь хэсгийн зөвлөгөөн өнөөдөр Төрийн ордонд нээлтээ хийлээ. Зөвлөгөөнд Сонгинохайрхан, Сүхбаатар дүүргийн багш, ажилчид болон боловсролын салбарын мэргэжлийн байгууллагууд оролцож байна. Зөвлөгөөний нээлтэд Монгол Улсын Ерөнхий сайд У.Хүрэлсүх оролцож, мэндчилгээ дэвшүүлж, зөвлөгөөнийг нээсэн юм. Тэрээр нээлтийн үгэндээ “Боловсрол, соёл, шинжлэх ухаан, спортын сайд Ц.Цогзолмаа надад хандаж багш нарын улсын хоёрдугаар зөвлөгөөнийг 11 жилийн дараа зохион байгуулж, боловсролын шинэчлэлийн асуудлаа хэлэлцэх гэж байна. Энэ зөвлөгөөнийг Монгол Улсын Ерөнхий сайдын ивээл дор зохион байгуулах санал тавьсаныг би ихэд билэгшээн хүлээн авсан.

 

            Бид нийгэм, эдийн засгийн бүх салбарт 2018 онд их зүйлийг бүтээнэ. 2018 он бол Монгол Улсын Засгийн газрын үйл ажиллагааны хөтөлбөрийг хэрэгжүүлэхэд их ажлыг амжуулсан жил байх болно. Монгол Улсын Засгийн газраас үр хүүхдүүдийнхээ сурч боловсрох нөхцөлийг сайжруулахад онцгой анхаарал хандуулна. Монгол Улсын Засгийн газар юуны өмнө өнөөгийн ерөнхий боловсролын сургуулиудын гурван ээлжээр хичээллэж байгааг халж, бүх сургуулийг хоёр ээлжинд шилжүүлнэ. Мөн сургуулийн хүчин чадлыг нэмэгдүүлж, хүртээмжийг сайжруулна. Хот суурин газарт хүүхэд бүрийг  цэцэрлэгт явах боломжийг бий болгоно.

 

2018 онд боловсролын салбарт урьд өмнө хийгдэж байгаагүй ихээхэн хэмжээний бүтээн байгуулалт өрнөнө.  2018 онд улсын хэмжээнд улсын төсвийн болон гадаадын буцалтгүй тусламж, зээлийн хөрөнгөөр 46186 суудлын хүчин чадалтай 99 сургууль, 2090 орны хүчин чадалтай 19 дотуур байр, 20140 орны хүчин чадалтай 127 цэцэрлэгийг барьж эхэлнэ. Гурван ээлжээр хичээллэдэг ерөнхий боловсролын сургууль 2016 онд 31 байсан бол 2017 оны төгсгөлд 21 болж буурсан, 2019-2020 оны хичээлийн жил эхлэхэд гурван ээлжээр хичээллэдэг байдал бүрэн арилсан байх болно. Монгол Улсын Засгийн газраас багш нарын ажиллах нөхцөл бололцоог сайжруулах, боловсролын салбарын хүртээмж, чанарыг дээшлүүлэхэд шаардлагатай бүх арга хэмжээг хэрэгжүүлнэ.  

 

Багш, нарын болон нийт төрийн албан хаагчдын цалин, хөлсийг нэмэгдүүлэх, нийгмийн баталгааг хангах асуудал Засгийн газрын анхаарлын төвд байх болно гэдгийг тэмдэглэн хэлье” гэлээ.

 

Зөвлөгөөний нээлтийн дараа салбар хуралдаанууд МУИС, МУБИС, Багшийн хөгжлийн ордонд хуралдана. “Эрх зүйн шинэчлэл”, “Багшийн хөгжил, цалин хөлсний шинэчлэл”, “Сургалтын чанар, үнэлгээний шинэчлэл”, “Хүүхдийн хүмүүжил, төлөвшил, хөгжил, хамгаалал” гэсэн дөрвөн сэдвээр салбар хуралдаанууд болно.

 

Зөвлөгөөн орон нутагт бүсчилсэн хэлбэрээр болно. Хот болон орон нутагт болж буй зөвлөгөөнд нийт 36000 багш, удирдах ажилтныг төлөөлж нийслэл болон 21 аймгийн ерөнхий боловсролын сургуулийн багш, удирдах ажилтнууд оролцож байгаа юм. Зөвлөгөөнд төлөөлөгчөөр оролцоогүй хот, хөдөөгийн багш нар, удирдах ажилтнууд www.zuvluguun.edu.mn сайтаар дамжин онлайнаар оролцож, боловсролын бодлогод санал бодлоо тусгах боломжтойюм. 

Shuud.mn
Сонин хачин
Үнэн үг:
Энэ онд Боловсролын сайдын багцад 238 тэрбум төгрөг баталж, их бүтээн байгуулалт гэж шуугих гэж байх шиг байна. Боловсрол чухал энэ тухай өнгөрсөн 27 жилийн турш ярьсан , ирээдүй үедээ анхаарал тавих чухал, хүн бүр л үр хүүхдээ гэдэг. Гэхдээ энэ чухал зүйлд ойворгон зангаар хандаж болохгүй. Боловсролд Улсын төсвийн жаахан хөрөнгөө харамгүй хаяж ирсэн боловч хөрөнгө оруулалтын менежмент, үр ашгийн тухай хэн ч ярихгүй юм. Улаанбаатарын хэт төвлөрлөөс үүдэн нийслэлдээ сургууль цэцэрлэг нь ээлжтэй, дараалалтай, хөдөөдөө хоосон шахуу байшингууд олширч байна. Улаанбаатарт энэ олон сургуулийг энэ онд барих газар зай талбай, дэд бүтэц, техникийн нөхцөл ямар байгааг тооцсон хүн байгаа болуу. Техникийн нөхцөл олгох боломжгүй газар Буянт ухаад шинэ төрх эмнэлэгийг Ламбаа сайд хүчээр эхлүүлсэнээс хагас дутуу хөрөнгө хэдэн жил хэвтэж байгааг бүгд л харж байгаа. Тэгэхээр энэ олон сургууль цэцэрлэг үүний араас орохгүй би толгойгоороо хариуцна гэж хэлэх эрхэм байна уу.
2018-01-22