Хавдар судлалын үндэсний төвд энэ сарын 28-ны өдөр Монголд анх удаа амьд донороос элэг шилжүүлэн суулгах мэс заслыг амжилттай хийсэн. Энэ талаар өнөөдөр Хавдар судлалын үндэсний төвөөс мэдээлэл хийж байна. Хэвлэлийн бага хуралд нийслэлийн Засаг дарга С.Батболд, нийслэлийн Эрүүл мэндийн газрын дарга Л.Төмөрбаатар, ХСҮТ-ийн захирал Ж.Чинбүрэн, БНСУ ын Самсунг эрүүл мэндийн төвийн эмч нар, Элэг нэгт монголчууд сангийн тэргүүн Л.Мөнхбаясгалан нарын хүмүүс оролцлоо.
Мэс заслын талаар ХСҮТ-ийн захирал Ж.Чинбүрэн мэдээлэл өгөв. Амьд донороос элэг шилжүүлэн суулгасан анхны мэс заслыг хийлгэсэн өвчтний биеийн байдал тогтвортой, шинжилгээний үзүүлэлтүүд хэвийн байгааг онцлов. Донор энгийн тасагт шилжсэн бол элэг авсан хүн өнөөдрөөс хоол идэж эхэлсэн байна.
“42 настай Улаанбаатар хотын иргэн залууд түүний нагац дүү болох 20 настай залуу өөрийнхөө эрүүл элэгний талыг өгч, амьдрал бэлэглэлээ. Донорын хагалгаа таван цаг үргэлжилсэн. Харин элэг суулгах хагалгаа 7 цаг үргэлжилсэн. Хагалгааны явцад цус алдаагүй. Энэ нь хагалгааны дараа хүндрэл гарахгүй гэсэн үг” гэдгийг Ж.Чинбүрэн эмч хэллээ. Мөн тэрбээр нийслэлийн Засаг дарга С.Батболд тэрбум төгрөгийг шийдэж, энэ хагалгаанд ашигласан бүх багаж хэрэгслийг хандивласан. Энэ багаж хэрэгсэлгүй бол хагалгаа хийж чадахгүй байсан гэдгийг хэлж байна.
Хотын дарга С.Батболд “Өнөөдөр бид маш сайхан гэгээлэг үйлийн гэрч болж байна. Хүнд амьдрал бэлэглэнэ гэдэг үнэхээр сайхан зүйл. ХСҮТ-ийнхэн Монгол Улсын эрүүл мэндийн салбарт маш том алхам хийж, элэг шилжүүлэн суулгах мэс заслыг хийлээ. Нэг жилийн өмнө бид энд цуглаад, нэг тэрбум төгрөгийн өртөгтэй элэг шилжүүлэн суулгах тоног төхөөрөмжийг ХСҮТ-д авч өгөх гэрээнд гарын үсэг зурж байсан. Өнөөдөр ажил маань бодит болж, хагалгаагаа амжилттай хийсэнд баяртай байна. Тэр үед бид нэг зүйлийг тохирсон. ХСҮТ-ийнхэн анхны хагалгаагаа нийслэлийн иргэнд хийнэ гэсэн амлалт өгсөн. Амласан ёсоороо манай нийслэлийн иргэнд хагалгаа хийж, амжилттай боллоо” хэмээн ярилаа.
Анхны энэ хагалгаа үнэ төлбөргүй хийгдсэн аж. Санхүүжилт нь “Элэг бүтэн Монгол” хөтөлбөрийн хүрээнд Засгийн газраас гарсан юм байна.
Б.Энэрэл