ТЕГ-ын дарга асан Б.Хурцын өмгөөлөгч, хуульч О.Санчирбалтай ярилцлаа.
-Б.Хурцын нэхэмжлэлээр хариуцагч Ж.Батзанданд холбогдох шүүх хурал энэ сарын 12-нд болсон. Та шүүх хурлын шийдвэрийн талаар танилцуулна уу?
-УИХ-ын гишүүн Ж.Батзандан нь 2017 оны 11дүгээр сарын 06-ны өдөр Төрийн ордонд мэдээлэл хийхдээ миний үйлчлүүлэгчийн хуулиар олгогдсон нэр төрд нь халдаж дараах мэдээллийг тараасан байдаг.
Б.Хурцыг “...Дамирангийн Энхбат гэдэг залууг унтуулдаг, нойрсуулдаг тариа хийж хулгайлж, хууль бусаар авчирсан, С.Зоригийн хэргийг илрүүлснийхээ төлөө генерал цол хүртсэн байдаг, Эрдэнэтийн 49 хувийг Худалдаа хөгжлийн банкинд авч өгөх ажиллагааг гардан зохион байгуулсан хүн бол манай алдарт тагнуулч Б.Хурц юм. Түүний эхнэрийн дүү нь Шүүхийн шийдвэр гүйцэтгэх албанд гүйцэтгэх ажил хариуцсан хэлтсийн даргын албан тушаал хашдаг талаар хэвлэл мэдээллийнхэнд мэдээллэж олон нийтэд худал, мэдээ, мэдээллийг тараасан байдаг. Уг мэдээллийн дагуу Иргэний хэргийн анхан шатны шүүхэд Б.Хурц нэхэмжлэл гаргаж 2018 оны 02 дугаар сарын 12-ны өдөр Баянзүрх дүүргийн Иргэний хэргийн анхан шатны шүүхээр дээр дурьдсан асуудлаар хэлэлцэж Ж.Батзандан нь үндэслэлгүйгээр иргэн Б.Хурцын нэр төр, алдар хүндийг гутаасан мэдээллийг тараасан гэж шүүхээс шийдвэр гаргасан. Мөн гишүүнд хүний нэр төр, алдар хүндийг гутаасан хэлбэр болох хэвлэл мэдээллийн хэрэгсэл болох телевиз, сайт болон өөрийн ашигладаг олон нийтийн сүлжээ болох фэйсбүүк хуудсаараа дамжуулан мэдээллийнхээ талаар няцаалт болон залруулга хийхийг шүүхээс даалгасан шийдвэр гарсан. Гишүүний зүгээс шүүхийн шийдвэрийг хүндэтгэн үзэж мэдээлэл тараасан арга хэрэгслээ залруулга хийнэ гэдэгт итгэж байна.
-Ж.Батзандан гишүүн Б.Хурцыг Солонгос улс руу Элчин сайдаар томилогдох болсонтой холбогдуулан Төрийн ордонд нээлттэй сонсгол хийсэн. Энэ үед Даваагийн Энхбат хүн Б.Хурц гэгч нь намайг өс хонзонгийн улмаас намайг шоронд оруулсан гэх утгатай зүйлсийг ярьсан байдаг. Үүнд тайлбар өгөхгүй юу?
-Юуны түрүүнд хуульч хүнийхээ үүднээс харахад тухайн нээлттэй сонсгол гэх зүйл нь хууль зөрчсөн үйлдэл байсан. Нэг үгээр хэлбэл шүүхээс гадуур шүүх байгуулагдаж хүнийг гүтгэх шинжтэй хурал болсон. Энэ үед Б.Энхбат нь миний үйлчлүүлэгчийг олон нийтийн мэдээллийн хэрэгслийг ашиглаж өс хонзонгийн улмаас шалтгаалан Эрүүгийн хэрэг үүсгэж, цаашлаад шүүхэд нөлөөлж ялтан болгосон мэтээр хэлж, ярьж гүтгэсэн байдаг. Б.Энхбат гэх хүн нь Дүүргийн Эрүүгийн анхан шатны 1 дүгээр шүүхийн 2014 оны 02 дугаар сарын 21-ний өдрийн 261 дугаартай шийтгэх тогтоолоор гэм буруутай нь тогтоогдож, энэ нь Улсын дээд шүүх хүртэл хянан хэлцэгдэж түүнийг гэм буруутай нь тогтоогдсон байдаг. Энэ асуудлын хүрээнд өмгөөлөгчийн зүгээс 2017 оны 12 дугаар сарын 19-ний өдөр Нийслэлийн Сүхбаатар дүүрэг дэх Цагдаагийн хэлтэст өргөдөл гарган шалгуулж байна. Харин гомдол, мэдээллийг маань Цагдаагийн байгууллага нь удаашралтай шалгаж байна уу даа гэж хардаж байна. Учир нь Цагдаагийн байгууллага босоо тогтолцоотой, төвлөрсөн удирдлагатай хэн нэгэн дээд шатны албан тушаалтан үүрэг, чиглэл өгөх боломжтой бөгөөд энэ зүйлээс шалтгаалж хэрэг удааширч байна гэж үзэж байна.
-Б.Хурцыг шүүхээс эрэн сурвалжлах шийдвэр гаргасан байсан. Энэ талаар?
-2018 оны 02 дугаар сарын 12-ны өдөр болсон шүүх хурлын дараа ТВ-9 телевиз мэдээллийн хөтөлбөрөөрөө миний үйлчлүүлэгчийг Эрүүгийн хуулийн тусгай ангийн ангийн 155 дугаар зүйлийн 3-т зааснаар буюу “Гэмт хэрэг үйлдэж олсон эд хөрөнгөө худалдан борлуулсан” гэх зүйл ангиар шалгагдаж байгаа учир шүүхээс эрэн сурвалжилж байна гэх мэдээллийг цацсан байдаг. Энэ нь огт үндэслэлгүй мэдээлэл юм. Учир нь одоогийн Эрүүгийн хуульд 155 дугаар зүйлд ийм зүйл анги байхгүй, мөн миний үйлчлүүлэгч огт Цагдаагийн байгууллагад эрүүгийн хэрэг үүсгэгдэн шалгагдаж байгаа асуудал байхгүйг хариуцлагатайгаар мэдэгдэж байна. Энэ ТВ-9 телевизийн асуудлыг шалгуулахаар өнөөдөр Цагдаагийн байгууллагад хандаад холбогдох тайлбар, мэдүүлгээ ч өгсөн. Нэг зүйлийг нэмж хэлэхэд дээрх хүний нэр төр, алдар хүндэд байгаа асуудал нь цар хүрээнээсээ хальж байна.
Д. Сүрэн