Олон улсын санхүүгийн корпорацийн дэргэдэх Тогтвортой санхүүжилтийн холбооноос Монгол Улсад Тогтвортой санхүүжилтийн хөтөлбөрийг хэрэгжүүлжээ. Дөрвөн жилийн өмнөөс хэрэгжүүлж эхэлсэн хөтөлбөрийн анхны тайланг өнөөдөр танилцууллаа.

Танилцуулгын өмнө Олон улсын санхүүгийн корпорацийн суурин төлөөлөгч Туен Нгуен “Банк, санхүүгийн салбарт тогтвортой хөгжлийг хэрэгжүүлэх тал дээр Монгол Улсын санхүүгийн салбар нэлээн ахицтай байна. Хөгжиж буй бусад улс орнуудад үлгэр дууриал болохуйц амжилт гаргасан гэдгийг хэлэхэд таатай байна” гэдгийг онцлон тэмдэглэв.

Тогтвортой санхүүжилтийн холбоонд 34 улс гишүүнээр ажилладаг. Энэ орнууд нь дэлхийн хөгжиж буй орнуудын санхүүгийн 85 хувийг бүрдүүлдэг юм байна. Энэ тайланд гишүүн орнуудаас 19-ыг нь хамруулсан аж. Тус орнуудыг гурван түвшинд ангилсан бөгөөд хамгийн их амжилт гаргасан улсуудын тоонд Монголын санхүүгийн салбар багтжээ. Энэ амжилт нь бусад улсуудад үлгэр дууриал үзүүлэх түвшинд хүрснийг суурин төлөөлөгч Туен Нгуен хэлэв.

Б.Энэрэл