Авлигатай тэмцэх газраас өчигдөр албан мэдээлэл гаргалаа. Тус мэдээлэл “Жаст групп”-ийн ерөнхийлөгч асан Ш.Батхүү нарын гэм буруутай этгээдүүд ял завших боломжгүй гэсэн гол утгатай. Тэдний хэргийг хөөн хэлэлцэх хугацаа дуусах болоогүй гэдгийг АТГ сануулж, хэргийн цар хүрээ улам нэмэгдэж буйг мэдээлэв. Товчхондоо АТГ жараахайгаар дамжуулан акулыг барих ажилдаа оржээ. “Эрдэнэт” үйлдвэрийг барьцаалж, “Стандарт” банкнаас авсан зээлийг хэн, хэн идэв? Энэ асуултын учгыг авлигатай тэмцэх байгууллага атгасан бололтой, эрс хатуухан мэдээлэл цацаж байгаагаас нь харвал. Мөрдөн байцаалтын ажиллагаа явагдаж байгаа, илүү мэдээлэл өгөхгүй хэмээн халхавчилдаг хуулийн байгууллага энэ удаа “Эрдэнэт”-ийн асуудал дээр ийн том дуугарлаа. Гэвч үйл явц, өрнөл хамгаас чухал.
УИХ-ын гишүүн О.Баасанхүүгийн өгсөн мэдээллээр Жаст групп, Стандарт банкнаас 172 сая ам.долларын зээл авсан. Одоо 172 сая ам.долларын 51 сая ам.долларыг Эрдэнэт үйлдвэр, үлдсэн 121 сая ам.долларыг Төрийн банк төлөх нөхцөл байдал үүсээд байна. Энэ өрийг даруйхан төлөхгүй бол Эрдэнэт үйлдвэрийг битүүмжилнэ. Энэ бүхэнд “Жаст”-ын Ш.Батхүүгээс эхлээд тухайн үеийн ТӨХ-ны дарга Д.Сугар, Эрдэнэт үйлдвэрийн ерөнхий захирал Ч.Ганзориг, Эрдэнэт үйлдвэр ХК-ийн хуулийн хэлтсийн дарга Б.Мөнхжаргал, санхүүгийн хэлтсийн дарга Г.Галбаатар нарын нэр холбогдон, яригдаж буй. Цаашлаад Ерөнхий сайд асан С.Баярын нэр ч дурдагдана. Мөн тухайн үед засгийн эрхийг барьж байсан МАН-ын нэр нөлөө бүхий эрхмүүд ч АТГ-ын хаалгыг татах учиртай. Ерөнхий сайд асанаас эхлээд Монголын төрийн өмчийг худалдсан, хумсалсан бүхнийг хуулийн өмнө аваачиж чадвал АТГ-ын ач гавьяа тэр.
Дэргэдэх зөвлөлөөсөө “АТГ өөрөө авлигын үүр уурхай, авлигачдыг өөгшүүлдэг, өмгөөлдөг” гэх цол чимгийг зүүгээд буй авлигатай тэмцэх байгууллага энэ удаа нэрээ цэвэрлэх боломжийг атгаж авлаа. Монголын саалийн үнээ “Эрдэнэт”-ийг барьцаалсан нь тодорхой, ямар хэмжээний зээл авсан нь ил. Хэнээс эхэлж шалгах нь ойлгомжтой ийм хэрэг дээр АТГ мэдэн будилахгүйгээр үнэн мөнийг тогтоовол Монголын хуулийн байгууллага тэр дундаа авлигатай тэмцэх байгууллагын ажилд ард түмэн OK үнэлгээг өгнө.
Ямартай ч АТГ-аас ажлын хэсэг гарч, “Эрдэнэт”-ийн асуудлыг нарийвчлан шалгаж буйгаа ил тод мэдээлэв. Бүр гэм буруутай этгээдүүд ял завших боломжгүй хэмээн тод чангаар дуугарлаа. Гэм буруутайд дурдагдах этгээдүүдийн эрх мэдэл, мөнгөний өмнө сөхрөхгүйгээр ажиллаж, нийгмийн хүсэлт, хүлээлтийг биелүүлж, Монгол Улсад хууль үйлчилдгийг харуулах өдрийг хүлээе.
Б.Энэрэл