Нийслэлийн бүх дүүрэгт энэ сарын 1-нээс эхлэн хоёр, дөрөв, есөн сартай хүүхдүүдэд уушгины хатгалгаа үүсгэдэг пневмоккийн эсрэг 13 цэнт вакциныг хийж эхлээд байна. Үүнтэй холбогдуулан Эрүүл мэндийн яамнаас мэдээлэл хийлээ.

Нийслэлийн хэмжээнд одоогоор 500 гаруй хүүхэд уушгины хатгалгааны эсрэг вакцинд хамрагджээ.  Уушгины вакцины эхний тунг 2 сартай, хоёр дахь тунг 4 сартай, гурав дахь тунг 9 сартай хүүхдэд тус тус хийж байна.  Вакцины гурван тунг бүрэн авсан хүүхэд пневмококкоор үүсгэгдсэн уушгины хатгаа өвчний эсрэг 10-15 жилийн дархлаа тогтох боломжтой аж.  Иймд вакцинд товлосон хугацаандаа хамрагдах нь зүйтэй гэдгийг албаныхан сануулж байна.

Уушгины хатгалгаа нь 0-5 насны хүүхдийн өвчлөлийн тэргүүлэх шалтгаан болсон. Манай улсад 2016 оноос эхлэн нийслэлийн Сүхбаатар, Сонгинохайрхан дүүрэгт, 2017 онд Баянзүрх дүүрэгт уушгины хатгалгааны эсрэг вакциныг нэвтрүүлж, 87.900 хүүхдийг дархлаажуулсан байна. Уг дүүргүүдтэй вакцин нэвтрүүлж амжаагүй байсан дүүргүүдтэй харьцуулахад хатгалгаагаар хэвтэн эмчлүүлж буй хүүхдийн тоо 40 хувиар буурсан судалгаа гарчээ.  Тодруулбал нийт уушгины хатгаа өвчтэй хүүхдийн өвчлөлийг  40 хувиар, хүнд хэлбэрийн хатгааг 25-30 хувиар бууруулсан байна.

Энэ онд 38,000 хүүхдийг 3 удаагийн тунгаар дархлаажуулахад шаардлагатай 110,000 хүн/тун вакциныг НҮБ-ын Хүүхдийн санд захиалж, 35,000 хүн/тунг хүлээж авсан бол үлдэгдэл 75,000 хүн/тун вакциныг хоёрдугаар улиралд багтаан авах аж. Вакцины зах зээлийн үнэ 1 хүн/тун нь 13-15 ам.доллар байдаг. Харин НҮБ-ын Хүүхдийн сангийн хөнгөлттэй үнэ болох 3,5 ам.доллараар худалдан авч байгаа юм. 

2019 онд  улсын хэмжээнд 74,300 хүүхдийг 3 удаа дархлаажуулахад 202,700 хүн/ тун вакцин, дагалдах хэрэгсэл, тээврийн зардалд 2,069,000,000 төгрөг шаардлагатай юм байна. 

Г.Тэгшсүрэн