Төв аймгийн Жаргалант суманд цанын УАШТ болж аваргуудаа тодрууллаа. Тэмцээнд 10 багийн 60 гаруй цаначин өрсөлдсөнөөс Х.Хаш-Эрдэнэ дасгалжуулагчтай “Алдар” спорт хороо багийн дүнг тэргүүлэв. Харин эрэгтэйчүүдийн 15 км-ын сонгомол техникийн уралдаанд С.Дүүрэнбаяр түрүүлсэн бөгөөд спринт төрөлд ч алтан медаль хүртсэн байна.

Харин 10 км-ын тэших техникийн төрөлд ДАШТ-ий хүрэл медальт Б.Ачбадрах түрүүлсэн бол эмэгтэйчүүдийн 10 км-ын сонгомол болон спринт гэсэн хоёр төрөлд А.Энхтуул аваргалжээ. Харин таван км-ын тэших техникийн төрөлд Э.Ариунтунгалаг түрүүлсэн бөгөөд буухиа уралдаанд эрэгтэйчүүдэд “Хилчин” спорт хороо, эмэгтэйчүүдээс “Алдар” спорт хороо түрүүллээ. Энэ тэмцээний үеэр спортын мастер ес, дэд мастер ес төрсөн байна.

Б.Учрал