Малайзын Ерөнхий сайд Нажаб Разак өнгөрсөн 2015 онд томоохон авлигын дуулианд нэр холбогдсон түүхтэй. Тухайн үед түүнийг Малайзын Засгийн газрын мэдлийн сан болох “1MDB”-аас хувийн данс руугаа 700 сая ам.долларыг шилжүүлэн авсан хэмээн буруутгасан юм. Ерөнхий сайд болон “1MDB” сан энэ дуулиантай ямар ч холбоогүй гэдгээ илэрхийлсэн ч иргэдийн төөрөгдлийг арилгаж чадаагүй.
Нажаб Разак 2008 онд Ерөнхий сайд болсныхоо дараа тусгай төслүүдийг хэрэгжүүлэх зорилгоор “1MDB” санг байгуулсан юм.
Авлигын дуулианд дөрөөлөн сөрөг хүчин Ерөнхий сайдыг улс төрөөс зайлуулах олон оролдлого хийсэн ч бүтэлгүйтжээ. Сөрөг хүчний тэмцэл, ард түмний итгэлийг секунт, минутаар алдаж байсан Ерөнхий сайд дахин нэг сорилтой нүүр тулсан. Тэр нь Сингапур, Швейцарийн тал тус сантай холбоотой гүйлгээг хааж, улмаар АНУ-ын Холбооны мөрдөх товчоо уг санг шалгаж эхэлжээ. Улсын мөнгийг хувьдаа завшаагүй гэдгээ эцсээ хүртэл мэдэгдээд байсан Ерөнхий сайд саяхан гэм буруугүй нь тогтоогдсон юм. Тэрбээр хуурамч мэдээллийн золиос болсон нь энэ аж.
Тэгвэл Малайзын Ерөнхий сайдыг санаатайгаар гол байгаа болгож, албан тушаалыг нь савлуур мэт ганхуулсан ЭРХЭМ хэн бэ. Тэр савлуулагч нь Женевийн Их сургуулийн Профессор Николас Яннакопулос (Nicolas Giannakopoulos) гэгч аж.
Николас Яннакопулос өөрийн зохиосон “хуурамч үлгэр”-ээ дэлхийн нэр хүндтэй хэвлэлээр цацаж, Малайзын Засгийн газрын тэргүүний нэр хүндэд халджээ. Ерөнхий сайдын тухай материал анх түүний блогт нийтлэгдсэн нь учиртай. Тэрбээр өөрийн блогтоо материалыг байрлуулж, улмаар хэвлэлийг ашиглан, тараажээ. Николас Яннакопулосын энэ үйлдлийг хуурамч гэдгийг Швейцарийн тал тогтоосон байна. Швейцарийн “Le Temps” сонинд уг дуулианы улмаас “Николас Яннакопулос Женевийн их сургуулиас хөөгдсөн” хэмээн мэдээлжээ.
Нэг ёсондоо Нажаб Разакийг төрөөс зайлуулахын тулд сөрөг хүчнийхэн Николас Яннакопулосоос туслалцаа хүссэн нь энэ аж.
Захиалгат ажиллагааны золиос болсон Ерөнхий сайд Разак энэ долоо хоногийн эхээр хуурамч мэдээ, мэдээлэл тараасан хэвлэл болон иргэнийг яллах хуулийн төсөл боловсруулсан байна. Хуурамч мэдээлэл тараасан нь нотлогдвол 128 мянган ам.долларын торгууль, 10 хүртэлх жилийн хугацаагаар яллахаар төсөлд тусгажээ.
Николас Яннакопулосыг оффшор бүсэд данстай эрхмүүдийг "ангуучилдаг" нэгэн гэж болно. Олон улсын сэтгүүлчдийн консорциум /ICIJ/ өнгөрсөн хугацаанд хууль бус оффшор данстай эрхмүүдийг илчилж, олон хүн албан тушаалаасаа огцорсон.
Гэхдээ тус байгууллага Николас Яннакопулосоос зарим талаараа хожимддог. Өөрөөр хэлбэл “ангууч” оффшорын тухай материалыг аль хэдийнээ гартаа оруулчихсан, задлах эгзэгтэй мөчийг хүлээдэг.
Энэ сарын эхээр “Ройтерс" агентлаг уул уурхайн "Рио Тинто" компани болон Монгол Улсын сайд асан С.Баярцогттой холбоотой авлигын дуулианы талаарх мэдээллийг нийтэд түгээсэн билээ. Тус мэдээлэлд Швейцарийн прокурорууд С.Баярцогтын хэд хэдэн дансыг хааж, шалгаж буй талаар өгүүлсэн байдаг. Харин уг мэдээллээс хоёр долоо хоногийн дараа "Financial Times" сайт дээр Швейцарийн прокурорууд "Рио Тинто" компанийг шалгаагүй гэх хоёр өөр мэдээлэл цацагдсан юм. Хоёр өөр эх сурвалжтай уг мэдээллүүд иргэдийг төөрөгдүүлж буй.
Энэ бүх эргэлзээтэй мэдээллээс харахад “ангууч”-ийн дараагийн золиос нь Монголын улстөрч С.Баярцогт байж магадгүй нь. Николас Яннакопулос дэлхийн олон орны улстөрчдийг "шантаажилдаг" шигээ С.Баярцогтыг ч зүгээр өнгөрөөхгүй бололтой. Тэр дэлхийн болон Монголын хэвлэл мэдээллийн хэрэгслүүдийг ашиглан, С.Баярцогтыг авлигач, оффшорчин болгож харагдуулахаар ажиллаж эхэлснийг зарим эх сурвалж хэлж байна.
Мөн Монголын эрэн сурвалжлах сэтгүүлчид Николас Яннакопулостой холбогдож, мэдээлэл авсан байх магадлалтай. Тэрбээр тодорхой сэтгүүлчийг сонгож, оффшор данстай Монголын эрхмүүдийн талаарх нууц материалыг өгсөн байж болзошгүй. Өөрөөр хэлбэл оффшорын тухай мэдээллийг гартаа оруулсан хэмээн мэдэгдээд буй хүмүүсийн эх сурвалж нь Швейцарийн банк эсвэл ICIJ биш бололтой.
Дотоод, гадаад хэвлэлээр цацагдаж буй С.Баярцогтын авлигын дуулиан, уул уурхайн “Рио Тинто”-той холбоотой хэргийн талаарх мэдээллийг Николас Яннакопулос эх сурвалжаараа дамжуулан нийтэд түгээсэн байж магадгүй.
Малайзын Ерөнхий сайдыг нэг хэсэг нойргүй хонуулсан Николас Яннакопулос нь зохион байгуулалттай дуулиан, эрүүгийн гэмт хэргийн бүсийн шилдэг мэргэжилтнүүдийн нэг аж.
Малайзын Ерөнхий сайдтай холбоотой дуулианаас болж дэлхийн нэр хүндтэй Женевийн их сургуулиас хөөгдсөн Николас Яннакопулос нь "Business Developpement EMEA" байгууллагын Бизнесийн хөгжлийн асуудал хариуцсан захирлаар зургаан жил, Олон улсын эдийн засаг судалгаа шинжилгээний “Inside.CO SA” байгууллагын Ерөнхийлөгчөөр 2000 оноос тасралтгүй 17 жил ажилласан бол Эдийн засгийн нарийн судалгаа шинжилгээ, залилангаас урьдчилан сэргийлэх чиглэлээр үйл ажиллагаа явуулдаг "Inside.CO" байгууллагыг мөн 2000 оны нэгдүгээр сараас тэргүүлж, 18 жилийн турш удирджээ. Аюулгүй хөдөлгөөнт дуу, мессежийн системийг тэргүүлэгч "Adeya SA" компанийг тэрбээр 2010-2012 он хүртэл хоёр жил удирдсан юм. Тэрбээр мөн олон улсад үйл ажиллагаа явуулдаг "The Global Initiative Network" байгууллагын шинжээчээр ажилладаг байна. (Түүний ажлын түүхийг эндээс үзнэ үү)
Николас Яннакопулос Швейцарийн цагдаагийнхантай нягт холбоотой ажилладаг бөгөөд Бразилийн шүүхийн байгууллагаас “Мерит” хүндэт одонг хүртээж байжээ.
Б.Дэлгэрцэцэг