Чөлөөт бөхийн эрэгтэйчүүдийн 2018 оны “Дэлхийн цом”-ын тэмцээн дөрөвдүгээр сарын 7-8-нд АНУ-ын Айова хотод болж өндөрлөлөө. Тус тэмцээнд оролцсон манай улсын баг тамирчид зургаадугаар байрт жагсав.

Тус тэмцээнд  Иран, ОХУ-ын шигшээ баг оролцохоос татгалзсан. Улмаар ДБНХ (UWW)-ноос өнгөрсөн жилийн Парисын ДАШТ-д багийн дүнгээр 11 дүгээр байрт орсон Монгол Улсын шигшээ багийг оролцохыг урьсан. Ингэснээр манай улсын чөлөөт бөхийн эрэгтэй сүүлийн таван жил дараалан Дэлхийн цомд зодоглов.

Монголын шигшээ баг B хэсэгт Азербайжан, Казахстан, Куба улсын багтай таарсан бөгөөд хэсэг дотроо Казахстаныг 6:4 харьцаатай ялж, Кубад 3:7, Азербайжанд 3:7 харьцаатай ялагдсан байна. Тавдугаар байрын төлөө Гүржийн багтай барилдаж 4:6 харьцаатай ялагдаад зургаадугаар байрт оржээ. Энэ жилийн дэлхийн цомыг АНУ-ын баг тамирчид хүртсэн байна.

1. АНУ
2. Азербайжан
3. Япон
4. Куба
5. Гүрж
6. Монгол
7. Казахстан
8. Энэтхэг

Монголын багийн бүрэлдэхүүнд 57 кг-ын жинд гавьяат тамирчин Э.Бэхбаяр, 61 кг-д ОУХМ Т.Түвшинтулга, 65 кг-д Б.Батмагнай, 70 кг-д С.Ганбаяр, 74 кг-д гавьяат тамирчин Г.Мандахнаран, 79 кг-д ОУХМ Г.Идэрхүү, 86 кг-д О.Үйтүмэн, 92 кг-д Л.Төртогтох, 97 кг-д Ө.Батзул, 125 кг-д Н.Золбоо нар хүч үзсэн.

Багийн ахлагчаар МЧБХ-ны удирдах зөвлөлийн гишүүн П.Гансүх, албаны хүнээр П.Буяндэлгэр, дасгалжуулагчаар Б.Баттулга, шүүгчээр Ц.Сэрээтэр нар ажиллажээ.

Г.Тэгшсүрэн