УИХ дахь МАН-ын бүлгийн хурал өндөрлөлөө. Тус бүлгийн хуралдаанаар зээлийн хүүг бууруулах, тендэрийн хуульд өөрчлөлт оруулах, төвлөрлийг сааруулах, цахим орчныг хянах хуулийн төсөл боловсруулах, хүчирхийллийн эсрэг арга хэмжээ авах зэрэг таван асуудал хэлэлцсэн байна. Арилжааны банкуудын зээл олголт нэмэгдэж байгаатай холбогдуулан зээлийн хүүг бууруулах асуудлыг судлах гэнэ. Мөн төвлөрлийг сааруулах чиглэлээр судлах үүрэг бүхий УИХ-ын гишүүн Д.Тогтохсүрэнгээр ахлуулсан ажлын хэсэг байгуулжээ.
Хамгийн сүүлд нь Д.Гантулга гишүүнтэй холбоотой асуудлыг хэлэлцсэн байна. УИХ дахь МАН-ын бүлгийн дарга Д.Хаянхярваа:
-Манай бүлгийн зүгээс УИХ-ын гишүүн Д.Гантулгыг аваад үлдэх чиглэл өгөгдөөгүй. Хуулийн хүрээнд шийднэ гэсэн. Өнгөрсөн долоо хоногт прокуророос ирүүлсэн бичиг, УИХ-ын гишүүн Д.Гантулгын өргөдлийн дагуу Халдашгүй байдлын дэд хороогоор ороод дараа нь УИХ-аар шийдүүлэх ёстой гэсэн шийдтэй явсан.
Прокуророос ирүүлсэн албан бичиг Д.Гантулга гишүүний бүрэн эрхийг УИХ-ын тухай хуулийн 9.1 дэх заалтын дагуу түдгэлзүүлэх хүсэлт ирүүлсэн. Гэтэл ҮХЦ-ийн их суудлын хуралдаанаар энэ заалтыг хүчингүй болгосон. Үндсэн хуулийн их суудлын хуралдааны дүгнэлтийг УИХ дахин авч хэлэлцэхгүй, ҮХЦ-ийн дээд шатны хурал юм. Тиймээс хуулийг эргэж харах зайлшгүй шаардлага гарсан, УИХ-ын тухай хуульдаа өөрчлөлт оруулах хэрэгтэй гэж хуульчид зөвлөсөн. УИХ-ын гишүүн өөрөө түдгэлзэх өргөдлөө өгсөн. Гэвч хуулиар түдгэлзэх үндэслэл байхгүй. Тиймээс бүх зүйлийг хуулинд нийцүүлж шийднэ. Энэ долоо хоногт УИХ-ын тухай хуульд өөрчлөлт оруулах зохицуулалт хийж, Д.Гантулга гишүүний асуудлыг шийднэ гэж байгаа. Түүнээс бус Д.Гантулга гишүүнийг хамгаалахаар МАН чиглэл өгөөгүй гэлээ.
Тэрбээр мэдээлэл хийснийхээ дараа сэтгүүлчдийн сонирхсон асуултад хариулав.
-Үндсэн хуульд "УИХ гишүүн эрүүгийн хэрэгт холбогдсон бол бүрэн эрхийг түдгэлзүүлж болно" гэж заажээ. Үндсэн хуулиа бариад шийдэж болохгүй юу?
-Миний хувьд хуульч хүн биш учир тодорхой тайлбар өгч чадахгүй. Бид үүнийг УИХ-ын Ажлын албаны хуульчид, бусад хуульчдаас асуухад прокуророос ирүүлсэн бичгийн дагуу тайлбар хийнэ гэсэн чиглэл өгч байгаа. Энэ долоо хоногт тодорхой шийдвэр гарна.
Н.Энх
Уншиж байна |