УИХ-ын чуулганы нэгдсэн хуралдаанаар Хөдөлмөрийн тухай хуулийн шинэчилсэн найруулгыг хэлэлцээд, хэлэлцэхийг дэмжин, байнгын хороод шилжүүлэв. Дараагаар нь Ус бохирдуулсны төлбөрийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн бусад хуулийн төслүүдийг хэлэлцэж эхэллээ. Хэлэлцэж байгаа асуудалтай холбогдуулан гишүүд асуулт тавьж, саналаа хэлэв.

УИХ-ын гишүүн А.Сүхбат:

 -Туул гол манай хүн амын 50 хувийг тэжээж байна. Бусад улсад ундны усаа тусгай хамгаалалтад авдаг. Гүний усыг бид зах замбараагүй ашиглаж байгаа. Усаа хамгаалах хэрэгтэй.

УИХ-ын гишүүн Б.Элдэв-Очир:

-Гадаргын болон хөрсний усны асуудалд эрс буурсан. Улаанбаатар хотод  хэрэглээ ихсэхийн хэрээр усны нөөц багасч байна. Тийм учраас энэ асуудлыг олон талаас нь хэлэлцэх хэрэгтэй.

УИХ-ын гишүүн М.Оюунчимэг:

-Мэдээж, ундны усны нөөц багасч байгаа. Гэтэл усны төлбөрийг бууруулах төсөл оруулж ирж байгааг ойлгохгүй байна. Өргөдлийн байнгын хороо зарим гишүүдтэй нийлээд Туул гол орчмын тусгай зөвшөөрөлтэй аж ахуйн нэгжийн  зөвшөөрлийг цуцлахаар хэлэлцэж байгаа. Ундны усаа хамгаалах чиглэлд агентлаг, мэргэжилтэн бий болгох хэрэгтэй. Ундны усны төлбөрийг бууруулах биш Туул голоо тусгай хамгаалалтад авах хэрэгтэй гэлээ.

Ингээд Ус бохирдуулсны төлбөрийн тухай хуульд нэмэлт өөрчлөлт оруулах тухай хуулийн төслийг хэлэлцэхийг дэмжих санал хураалт явуулав. Чуулганы хуралдаанд оролцсон гишүүдийн олонхийн саналаар уг хуулийн төслийг хэлэлцэхийг дэмжив. 

Ийнхүү үдээс хойшх хуралдаан өндөрлөлөө.

Н.Энх